Te tāpi paridevamānā ānetvā kumārānaṃ santike kariṃsu. Atha rājā cattāro seṭṭhino āharāpento itaraṃ gāthamāha

gahapatayopi vadetha puṇṇamukhaṃ bhaddiyaṃ siṅgālañca

vaḍḍhañcāpi gahapatiṃ pasu kira hotha yaññatthāyāti.

Rājapurisā gantvā te ānayiṃsu. Rañño puttadāre gayhamāne sakalanagaraṃ na kiñci avoca. Seṭṭhikulāni pana mahāsambandhāni tasmā tesaṃ gahitakāle sakalanagaraṃ saṃkhubhi. Rañño seṭṭhino māretvā yaññaṃ yajituṃ na dassāmāti te seṭṭhino parivāretvāva tesaṃ ñātivaggena saddhiṃ rājakulaṃ agamaṃsu. Atha te seṭṭhino ñātigaṇaparivutā rājānaṃ vanditvā attano jīvitaṃ yāciṃsu.