Tattha nigaḷabandhakāpīti api nāma mayaṃ mahānigaḷehi bandhakā hutvā. Yassa honti tava kāmāti sacepi kaṇḍahālassa dātukāmosi tassapi no dāse katvā dehi karissāmassa dāsakammanti vadati. Api raṭṭhāti sace amhākaṃ koci doso atthi raṭṭhato no pabbājehi api nāma raṭṭhā pabbājitā kapaṇā viya kapālaṃ gahetvā bhikkhācariyaṃ carissāma mā no deva avadhi dehi no jīvitanti vilapati.

Tassa taṃ nānappakāraṃ vilāpaṃ sutvā rājā hadayaphālanaṃ patto viya assupuṇṇehi nettehi na me koci putte māretuṃ lacchati na mamattho devalokenāti sabbe te mocetuṃ āha

dukkhaṃ kho me janayittha vilapantā jīvitassa kāmāhi

muñcathadāni kumāre alaṃpi me hotu puttayaññenāti.