mā no deva avadhi dāse no dehi kaṇḍahālassa

yassa honti tava kāmā api raṭṭhā pabbājitā

bhikkhācariyaṃ carissāmāti

tattha pubbeti tāta yadi ahaṃ māretabbo atha kasmā Amhākaṃ ñātijano pubbe mama jātakāle brāhmaṇe sotthānaṃ avācesi. Tadā kira kaṇḍahālo ca mama lakkhaṇāni upadhāretvā imassa kumārassa na koci antarāyo bhavissati tumhākaṃ accayena rajjaṃ kāressatīti āha iccassa purimena pacchimaṃ na sameti musāvādī esa atha no etassa vacanaṃ gahetvā akāraṇasmā nikkāraṇāyeva yaññatthāya deva ghātesi mā amhe ghātesi ayaṃ hi mayi ekasmiṃ verena mahājanaṃ māretukāmo sādhukaṃ sallakkhesi narindāti. Pubbeva noti mahārāja sace amhe māretukāmo pubbeva no daharakāleyeva kasmā sayaṃ vā na hanesi na aññehi vā ghātāpesi idāni pana mayaṃ daharā taruṇā paṭhamavaye ṭhitā puttadhītāhi saṃvaḍḍhāma evaṃ bhūtā tava adūsakāva kiṃ kāraṇā haññāmāti. Passa noti amhe cattāropi bhātike passa. Yujjhamāneti paccatthikānaṃ nagaraṃ parivāretvā ṭhitakāle amhādise putte tehi saddhiṃ yujjhamāne passa. Aputtakā hi rājāno anāthā nāma honti. Mādisāti amhādisā puttā sūrā balappattā na yaññatthāya māretabbā honti. Niyojantīti tesaṃ paccāmittānaṃ gaṇhanatthāya niyojenti. Atha noti atha amhe. Akaraṇasmāti akāraṇena. Abhūmiyanti anokāseyeva kasmā tāta haññāmāti attho. Mā tassa saddahesīti mahārāja maṃ kaṇḍahālo na ghātayeti mā tassapi saddaheyyāsi. Bhogaṃ pissāti bhogaṃpi assa brāhmaṇassa rājāno denti. Athaggapiṇḍikāpīti athete aggodakaṃ aggapiṇḍaṃ labhantā aggapiṇḍakāpi honti. Tesaṃpīti yesaṃ kule bhuñjanti Tesaṃpi evarūpānaṃ piṇḍadāyakānaṃ dubbhituṃ icchanti.