sabbe vajjanti nirayaṃ ye yajanti yepi vā yajāpenti

ye cāpi anumodanti yajantānaṃ edisaṃ mahāyaññanti.

Tattha brāhmaṇo tāvāti paṭhamantāva kaṇḍahālo yajatu. Sakehīti attano puttehi atha tasmiṃ evaṃ yajitvā devalokaṃ gate pacchā tvaṃ yajissasi deva sādhurasabhojanampi hi tvaṃ aññehi vīmaṃsitvā bhuñjasi puttamaraṇaññeva kasmā avīmaṃsitvā karosīti dīpento evamāha. Evaṃ jānanti puttadhītaro māretvā devalokaṃ gacchantīti evaṃ jānanto kiṃ kāraṇā attano putte ca ñātī ca attānañca na ghātesi. Sace hi paraṃ māretvā devalokaṃ gacchanti attānameva māretvā brahmaloko gantabbo bhavissatīti evaṃ yaññaguṇaṃ jānantena paraṃ amāretvā attāva māretabbo siyā ayaṃ pana tathā akatvā maṃ mārāpeti imināpi kāraṇena kaṇḍahālassa kammaṃ jānāhi mahārāja yathā esa vinicchaye vilopaṃ kātuṃ alabhanto evaṃ karotīti. Edisanti evarūpaṃ puttaghātayaññaṃ.

Kumāro ettakaṃ kathento pitaraṃ attano vacanaṃ gāhāpetuṃ asakkonto rājānaṃ parivāretvā ṭhitaṃ rājaparisaṃ ārabbha āha