tyajja candasuriyā ubhova pattikā yantīti.

Tattha kāsikasucivatthadharāti kāsiyāni sucivatthāni dhāriyamānā. Candasuriyāti candakumāro ca suriyakumāro ca. Nahāpakasunahātāti candanacuṇṇena ubbattetvā nahāpakehi kataparikammakatāya sunahātā. Yassūti ye assūti nipātamattaṃ. Ye kumāreti attho. Pubbeti ito pubbe. Hatthivaradhuragateti hatthivarānaṃ dhuragate alaṅkatahatthikkhandhavaragate. Assavaradhuragateti assavarapiṭṭhigate. Rathavaradhuragateti rathavaramajjhagate. Nīyiṃsūti nikkhamiṃsu.

Evaṃ tāsu paridevantīsuyeva bodhisattaṃ nagarā nīhariṃsu. Tadā sakalanagaraṃ saṃkhubhi. Nāgarā nikkhamituṃ ārabhiṃsu. Mahājane nikkhamante dvārāni nappahonti. Brāhmaṇo atibahujanaṃ disvā ko jānāti kiṃ bhavissatīti nagaradvārāni thakāpesi. Mahājano nikkhamituṃ Alabhanto antonagaradvārassa āsannaṭṭhāne uyyānaṃ atthi tassa santike mahāviravaṃ viravi. Tehi ravehi sakuṇasaṃghā saṃkhubhitvā ākāse pakkhandiṃsu. Mahājano taṃ taṃ sakuṇaṃ āmantetvā vilapanto āha

yadi sakuṇi maṃsamicchasi uyyassu pubena pupphavatiyā