tathā hessati pupphavatiyā yiṭṭhesu candasuriyesūti.

Tattha erāvaṇoti tassa hatthino nāmaṃ. Ekakhuroti abhinnakhuro. Sāliyā viya nigghosoti gamanakāle sāliyānaṃ viya madhurena nigghosena samannāgato. Kathannāma sāmasamasundarehīti suvaṇṇasāmehi aññamaññaṃ jātiyā samehi niddosatāya sundarehīti attho. Candanamarukagattehīti lohitacandanalittaṅgehi. Brahāraññāti yathā te gāmanigamā suññā nimmanussā brahāraññā honti tathā pupphavatiyāpi raññā yiṭṭhesu rājaputtesu suññā araññasadisā bhavissatīti.

Te mahājanā bahi nikkhamituṃ alabhantā antonagareyeva carantā parideviṃsu. Bodhisattopi yaññāvāṭaṃ nīto. Athassa mātā gotamī nāma devī puttānaṃ me jīvitaṃ dehi devāti rañño pādamūle nipatitvā paridevamānā āha

ummattikā bhavissāmi bhūnahatā paṃsunāva parikiṇṇā