upayācitakena puttaṃ labhanti mā tāta no aghātesi

mā kapaṇaladdhakehi puttehi ammāya no vippavāsehīti.

Tattha dibyanti deva aputtikā daliddāpi nāriyo puttatthikā hutvā bahuṃpaṇṇākāraṃ haritvā puttaṃ vā dhītaraṃ vā labhissāmāti dibyaṃ upayācanti. Paṭibhāṇānipi hitvāti dohaḷāni chaḍḍetvāpi alabhitvāpīti attho. Idaṃ vuttaṃ hoti mahārāja nārīnaṃ hi uppannaṃ dohaḷaṃ alabhantīnaṃ gabbho sussitvā nassati tattha ekaccā yācanti putte alabhamānā kāci laddhaṃ dohaḷaṃ pahāya aparibhuñjitvā na labhanti kāci dohaḷaṃ alabhamānā na labhanti mayhaṃ pana mātā dohaḷaṃ labhitvā paribhuñjitvā uppannagabbhaṃ avināsetvā putte paṭilabhati evaṃ paṭiladdhe māno avadhīti yācati. Assāsakānīti mahārāja ime sattā āsā karonti kinti puttā no jāyantūti. Tato ca puttāti puttānaṃpi no puttā jāyantūti. Atha No akāraṇasmāti atha tvaṃ amhe akāraṇena yaññatthāya ghātesi. Upayācitakenāti devatānaṃ āyācanena. Kapaṇaladdhakehīti kapaṇāya hutvā laddhakehi puttehi amhehi saddhiṃ amhākaṃ ammāya mā vippavāsehi mā no mātarā saddhiṃ vippavāsaṃ karissasīti vadati.

So evaṃ vadantopi pitu santikā kiñci vacanaṃ alabhitvā mātu pādamūle nipatitvā paridevamāno āha