vilasataṃpi maṃ katvā yajassu sattadhā mahārāja

Mā jeṭṭhaputtaṃ avadhi apekkhitaṃ sabbalokassāti.

Tattha evanti andhabālena ekarājena vutte. Hantīti deva kinnāmetaṃ kathesīti vatvā hatthatalehi attānaṃ hanti hanti. Pissāmīti pivissāmi. Ime tepīti imepi vasulakumāraṃ ādiṃ katvā sesadārake hatthe gahetvā rañño pādamūle ṭhitā evamāha. Guṇinoti mālāguṇābharaṇehi samannāgatā. Kāyūradhārinoti kāyūrapasādhanadharā. Vilasatanti mahārāja maṃ ghātetvā koṭṭhāsasataṃ katvā. Sattadhāti sattasu ṭhānesu yaññaṃ yajassu.

Iti sā rañño santike imāhi gāthāhi paridevitvā assāsaṃ alabhamānā bodhisattasseva santikaṃ gantvā paridevamānā aṭṭhāsi. Atha naṃ so cande mayā jīvamānena tuyhaṃ tasmiṃ tasmiṃ vatthusmiṃ subhaṇite sukathite uccāvacāni muttādīni bahūni ābharaṇāni dinnāni ajja pana te idaṃ pacchimakaṃ dānaṃ sarīrāruḷhante ābharaṇaṃ dammi gaṇhāhi nanti āha.