maṃsarasabhojanā nahāpakasunahātā kuṇḍalino aggalucandanavilittā

niyyātha candasuriyā janassa katvā hadayasokanti.

Tattha phullā mālāti pupphadāmāni. Tesajjāti tesaṃ ajja. Nettiṃsoti asi. Vivattissatīti patissati. Acirā vatāti acirena vata. Na phāletīti na bhijjati. Tāva daḷhabandhanañca me āsīti ativiya thirabandhanaṃ me hadayaṃ bhavissatīti attho. Niyyāthāti nigacchatha.

Evaṃ tassā paridevantiyā yaññāvāṭesu sabbakammaṃ niṭṭhāsi. Amaccā rājaputtaṃ netvā gīvaṃ onāmetvā nisīdāpesuṃ. Kaṇḍahālo suvaṇṇapātiṃ upanāmetvā khaggaṃ ādāya tassa gīvaṃ chindissāmīti aṭṭhāsi. Taṃ disvā candādevī aññaṃ me paṭisaraṇaṃ natthi attano saccabalena sāmikassa sotthiṃ karissāmīti añjaliṃ paggayha parisāya antarantare vicarantī saccakiriyaṃ akāsi.