nandippavesanagaraṃ bandhamokkho aghosathāti.

Tattha rājapurisā cāti rājaparisāpi tīhi saṃkhehi naṃ abhisiñciṃsu. Rājakaññāyoti khattiyadhītaropi naṃ abhisiñciṃsu. Devaparisā cāti sakko devarājā vijayuttarasaṃkhaṃ gahetvā devaparisāya saddhiṃ abhisiñci . Devakaññāyoti sujātāpi devadhītā devakaññāhi saddhiṃ abhisiñci. Celukkhepamakarunti nānāvaṇṇehi vatthehi dhaje ussāpetvā uttarisāṭakāni ākāse khipantā celukkhepaṃ kariṃsu. Rājaparisā cāti rājaparisā ca itare ca tayo koṭṭhāsā abhisekakārakā cattāropi Koṭṭhāsā kariṃsuyeva. Ānandino ahuvādiṃsūti āmoditā pamoditā ahesuṃ. Nandippavesanagaranti candakumārassa chattaṃ ussāpetvā nagaraṃ paviṭṭhakāle nagare ānandabheriṃ cariṃsu. Kimatthāya. Yathā amhākaṃ candakumāro bandhanā mutto evameva sabbe bandhanāni muñcantūti. Tena vuttaṃ bandhamokkho aghosathāti.

Atha kho bodhisatto pituvattaṃ paṭṭhapesi. Antonagaraṃ pavisituṃ na labhati. Paribbayassa khīṇakāle bodhisatto uyyānakiḷādīnaṃ atthāya gacchanto taṃ upasaṅkamitvā pitaraṃ na vandati. Ekarājā añjaliṃ pana katvā ciraṃ jīvatu sāmīti vadati. Kenatthoti vutte so ārocesi. Athassa so paribbayaṃ dāpesi. So dhammena rajjaṃ kāretvā āyuhapariyosāne devalokaṃ pūrayamāno agamāsi.

Satthā imaṃ dhammadesanaṃ āharitvā saccāni pakāsetvā na bhikkhave idāneva pubbepi devadatto maṃpi ekaṃ nissāya bahū jane māretuṃ vāyāmamakāsīti vatvā jātakaṃ samodānesi. Tadā kaṇḍahālo devadatto ahosi gotamī devī mahāmāyā ahosi candādevī rāhulamātā vasulo rāhulo selā kumārī uppalavaṇṇā suro ānando rāmagotto kassapo bhaddaseno moggalāno suriyakumāro sāriputto sakko anuruddho. Tadā parisā buddhaparisā ahesuṃ. Candakumāro pana ahameva sammāsambuddhoti.