tasmā na yiṭṭhe na hute arañjinti.

Imā gāthā vatvā attano sāvakabhāvaṃ pakāsanatthaṃ tathāgatassa pādapiṭṭhe sīsaṃ ṭhapetvā satthā me bhante bhagavā sāvakohamasmīti vatvā ekatālaṃ dvitālaṃ titālanti yāva sattatālappamāṇaṃ sattakkhattuṃ vehāsaṃ abbhuggantvā oruyha tathāgataṃ vanditvā ekamantaṃ nisīdi. Taṃ pāṭihāriyaṃ disvā mahājano aho mahānubhāvo buddho evaṃ thāmagatadiṭṭhiko nāma attānaṃ arahāti maññamāno uruvelakassapopi diṭṭhijālaṃ bhinditvā tathāgatena damitoti satthu guṇakathaññeva kathesi.

Taṃ sutvā bhagavā anacchiriyaṃ upāsakā idāni sabbaññutañāṇappattena mayā imassa damanaṃ svāhaṃ pubbe sarāgasadosasamohakālepi nārado nāma brahmā hutvā imassa diṭṭhijālaṃ bhinditvā imaṃ nibbisevanaṃ akāsinti vatvā tuṇhī ahosi tāya parisāya yācito atītaṃ āhari.

Atīte videharaṭṭhe mithilāyaṃ aṅgati nāma rājā rajjaṃ kāresi so dhammiko dhammarājā. Tassa rucā nāma dhītā ahosi abhirūpā dassanīyā pāsādikā kappasatasahassapatthitappatthanā mahāpuññā tassa Aggamahesiyā kucchimhi nibbattā. Sesā panassa soḷasasahassā itthiyo vañjhā ahesuṃ. Tassa sā dhītā piyā manāpā ahosi. So tassā nānāpupphapūrehi pañcavīsatipupphasamugehi saddhiṃ anagghāni atisukhumāni ca vatthāni imehi attānaṃ alaṅkarotūti devasikaṃ devasikaṃ pahiṇi. Khādaniyassa bhojaniyassa ca pamāṇaṃ natthi. Anvaḍḍhamāsaṃ dānaṃ detūti sahassaṃ pesesi. Tassa kho pana vijayo sunāmo alātoti tayo amaccā ahesuṃ. So komudiyā cātumāsiniyā paṭhamachaṇe vattamāne devanagare viya nagare ca antepure ca alaṅkate sunahāto suvilitto sabbālaṅkārapaṭimaṇḍito bhuttasāyamāso vivaṭasīhapañjare mahātale nisinno amaccagaṇaparivuto visuddhaṃ gagaṇatalaṃ abhilaṅghamānaṃ candamaṇḍalaṃ disvā aho ramaṇīyā vata bho dosināratti kāya nukhvajja ratiyā abhirameyyāmāti amacce pucchi.