cātumāsā komudajja juṇhaṃ byapahataṃ tamaṃ

Kāyajja ratiyā rattiṃ viharemu imaṃ utunti.

Tattha pahutayogoti pahutena hatthiyogādinā samannāgato. Anantabalaporisoti anantabalakāyo. Anāgateti pariyosānaṃ asampatte anatikkanteti attho. Cātumāsāti catunnaṃ vassika māsānaṃ pacchimadivasabhūtāya rattiyā. Komudiyāti phullakumudāya. Mitapubbeti paṭhamaṃ hasitaṃ katvā pacchā kathanasīle. Tamanupucchīti tantesu tīsu amaccesu ekekaṃ amaccaṃ anupucchi. Paccekaṃ brūtha saṃrucinti sabbepi tumhe attano attano ajjhāsayānurūpaṃ kathaṃ atno ruciṃ paccekaṃ mayhaṃ kathetha. Komudajjāti komudī ajja. Juṇhanti juṇhāya nissayabhūtaṃ candamaṇḍalaṃ abbhuggataṃ. Byapahataṃ tamanti tena sabbaṃ andhakāraṃ vihataṃ. Utunti ajja rattiṃ imaṃ evarūpaṃ utuṃ kāya ratiyā vihareyyāmāti.

Atha amacce pucchi. Te tena pucchitā attano attano ajjhāsayānurūpaṃ kathaṃ kathayiṃsu.