kathañcare balakāyasmiṃ kathaṃ janapade care

kathaṃ dhammañcaritvāna pacce gacchanti sugatiṃ

kathañceke adhammaṭṭhā patanti nirayaṃ adhoti.

Tattha mudukā bhisiyāti mudukāya sukhasamphassāya bhisiyā. Muducittakasaṇṭhateti sukhasamphasse cittattharaṇe. Mudupaccatthateti mudunā paccattharaṇena paccatthate. Sammodīti ājīvakena saddhiṃ sammodanīyaṃ kathaṃ akāsi. Tatoti tato nisajjanato anantarameva sārāṇīyaṃ kathaṃ kathesīti attho. Kacci yāpanīyanti kacci vo Bhante sarīraṃ paṇītapaccayehi yāpetuṃ sakkā. Vātānamaviyattatāti kacci vo sarīre vāyudhātuyo samappavattā vātānaṃ viyattatā natthi. Tattha tattha vaggavaggā hutvā vātā na bādhantīti attho. Akasirāti niddukkhā. Vuttīti jīvitavutti. Appābādhoti iriyāpathabhañjanakena ābādhena virahito. Cakkhūti kacci vo cakkhuādīni indriyāni na parihāyantīti pucchi. Paṭisammodīti sammodanīyakathāya paṭikathesi. Tattha sabbametanti yaṃ tayā vuttaṃ vātānamaviyattatāti ādi sabbantaṃ tatheva. Tadūbhayanti yaṃ tayā appābādhovasi kacci cakkhu na parihāyatīti vuttaṃ taṃpi ubhayaṃ tatheva. Na balīyareti nābhibhavanti na kuppanti. Anantarāti paṭisanthārato anantarā pañhaṃ pucchi. Tattha atthaṃ dhammañca ñāyañcāti pālīatthañca pālīdhammañca kāraṇayuttañca. So hi kathaṃ dhammañcareti pucchanto mātāpituādīsu paṭipattidīpakaṃ pālīatthañca pālīdhammañca kāraṇayuttañca me kathethāti imaṃ atthañca dhammañca ñāyañca pucchi. Tattha kathañceke adhammaṭṭhāti ekacce adhamme ṭhitā kathaṃ nirayañceva adhosirā uddhapādā apāye ca patantīti.