Tattha bhāvaseṭṭhīti evaṃ nāmako asītikoṭivibhavo seṭṭhī. Guṇeratoti guṇamhi rato. Sammatoti sambhāvito. Sucīti sucikammo. Idha jāto duritthiyāti imasmiṃ mithilanagare duritthiyā daliddāya kapaṇāya kumbhadāsiyā kucchimhi jātosmi. So kira pubbe kassapabuddhakāle araññe naṭṭhaṃ balibaddaṃ gavesamāno ekena maggamuḷhena bhikkhunā maggaṃ puṭṭho tuṇhī hutvā puna tena pucchito kujjhitvā samaṇadāsā nāmete mukharā honti dāsena tayā bhavitabbanti atimukharāsīti āha. Taṃ kammaṃ tadā vipākaṃ adatvā bhasmacchanno viya pāvako ṭhitaṃ maraṇasamaye aññaṃ kammaṃ upaṭṭhāsi. So yathā kammaṃ saṃsāre saṃsaranto ekassa kusalakammassa phalena sākete vuttappakāro seṭṭhī hutvā dānādīni puññāni akāsi. Taṃ panassa kammaṃ paṭhaviyaṃ nihitanidhi viya ṭhitaṃ okāsaṃ labhitvā vipākaṃ dasseti. Yaṃ pana tena maggamuḷhaṃ bhikkhuṃ akkosantena kataṃ pāpakammaṃ tamassa tasmiṃ attabhāve vipākaṃ adāsi. So ajānanto itarassa kalyāṇakammassa phalena kumbhadāsiyā kucchimhi nibbattosmīti saññāya evamāha. Yato jāto suduggatoti svāhaṃ jātakālato Paṭṭhāya atiduggatoti dīpeti. Samacariyamadhiṭṭhitoti samacariyāyameva patiṭṭhitomhi. Nūnetanti ekaṃsenetaṃ. Maññidaṃ sīlanti deva idaṃ sīlaṃ nāma niratthakaṃ maññe. Alātoti yathā ayaṃ alātasenāpati mayā purimabhave bahuṃ pāṇātipātapāpakammaṃ katvā senāpatiṭṭhānaṃ laddhanti bhāsati tena kāraṇenāhaṃ niratthakaṃ sīlanti maññāmi. Kalimevāti yathā asippo asikkhito akkhadhutto parājayaggāhaṃ gaṇhati tathā nūna gaṇhāmi purimabhave attano sāpateyyaṃ nāsetvā idāni dukkhaṃ anubhavāmi. Kassapabhāsitanti kassapagottassa acelakassa bhāsitaṃ sutvāti vadati.

Vījakassa vaco sutvā rājāaṅgatimabravi

natthi dvāraṃ sugatiyā niyataṃ kaṅkha vījaka

sukhaṃ vā yadi vā dukkhaṃ niyataṃ kira labbhati