Tattha tatoti tato rañño kāmapaṅke laggadivasato paṭṭhāya. Dvesattarattassāti cuddasame divase. Dhātimātaramabravīti pitu santikaṃ gantukāmā hutvā dhātimātaro āha. Sā kira cātuddase nānāvaṇṇāni ca vatthāni nivāsetvā pañcakumārīsatāhi parivutā dhātigaṇaṃ ādāya mahantena sirivilāsena attano sattabhūmikā rativaḍḍhanapāsādā oruyha pitu dassanatthaṃ candakapāsādaṃ gacchati. Atha naṃ pitā disvā tuṭṭhamānaso mahāsakkāraṃ kāretvā uyyojento amma dānaṃ dehīti sahassaṃ datvā uyyojesi. Sā attano nivesanaṃ gantvā puna divase uposathikā hutvā kapaṇaddhikavanibbakayācakānaṃ mahādānaṃ deti. Raññā kirassā eko janapado dinno. Tato āyena sabbakiccāni karoti. Tadā pana raññā kira guṇājīvakaṃ nissāya micchādassanaṃ gahitanti sakalanagare ekakolāhalamahosi. Taṃ rucāya dhātiyo sutvā rājadhītāya ārocayiṃsu ayye pitarā kira te ājīvakassa kathaṃ sutvā micchādassanaṃ gahitaṃ so kira rājā catūsu nagaradvāresu dānasālāyo viddhaṃsāpetvā parapariggahitā itthiyo ca kumārikāyo ca pasayhākārena āṇāpesi rajjaṃ na vicāresi kāmamadamattoyeva jātoti. Sā tāsaṃ kathaṃ sutvā anattamanā hutvā kathaṃ hi nāma me pitā tādisaṃ apagatasukkadhammaṃ nillajjaṃ naggabhogaṃ guṇaṃ upasaṅkamitvā pañhaṃ pucchati nanu dhammikasamaṇabrāhmaṇo Kammavādī upasaṅkamitvā pucchitabbo siyā ṭhapetvā kho pana maṃ añño mayhaṃ pitaraṃ micchādassanā mocetvā sammādassane patiṭṭhapetuṃ samattho nāma natthi ahamhi atītā satta anāgatā sattāti cuddasajātiyo sarāmi tasmā pubbe attanā kataṃ pāpakammaṃ kathetvā pāpakammassa phalaṃ dassetvā mama pitaraṃ bodhessāmi sace pana ajjeva gamissāmi atha mama pitā maṃ amma tvaṃ pubbe aḍḍhamāsaṃ āgacchasi ajja kasmā lahuṃ āgatāsīti vakkhati tatra ce ahaṃ tumhehi kira micchādassanaṃ gahitanti sutvā āgatamhīti vakkhāmi na me vacanaṃ garukaṃ katvā gaṇhissati tasmā ajja agantvā ito cuddasame divase kāḷapakkhe cātuddaseyeva kiñci ajānantī viya pubbe gamanākāreneva gantvā āgamanakāle dānavattatthāya sahassaṃ yācissāmi tadā me pitā diṭṭhiyā gahitabhāvaṃ kathessati atha naṃ ahaṃ attano balena micchādiṭṭhiṃ chaḍḍāpessāmīti cintesi. Tasmā cuddasame divase pitu santikaṃ gantukāmā hutvā evamāha. Tattha sakhiyo cāti sahāyikāyopi me pañcasatā kumārikāyo ekāyekaṃ asadisaṃ katvā sabbā nānālaṅkārehi nānāvaṇṇehi pupphagandhavilepanehi alaṅkarontu. Dibyoti dibbadivaso. Devatāsannipātapaṭimaṇḍitotipi dibbo. Gacchanti mama dānavattaṃ āharāpetuṃ videharājassa pitu santikaṃ gamissāmi. Abhihariṃsūti soḷasahi gandhodakaghaṭehi nahāpetvā maṇḍetvā kumārikānaṃ maṇḍanatthāya kira abhihariṃsu. Parikīriyāti parivāretvā. Asobhiṃsūti caṃru parivāretvā rājadhītaraṃ devakaññā viya taṃ divasaṃ ativiya sobhiṃsu.