unanmeti tulāsīsaṃ bhāre oropite sati

evameva naro puññaṃ thokaṃ thokampi ācinaṃ

saggātimāno dāso va vījako sātave ratoti.

Tattha nirayeti aṭṭhavidhe mahāniraye soḷasavidhe ussudaniraye lokantaniraye ca. Bhāroti tāta na tāvassa akusalabhāro pūrati. Tassāti tassa pubbe katassa puññassa esa nissando yaṃ so alātasenāpati tappaccayaṃ sukhaṃ labhati. Na hi tāta etaṃ goghātakakammassa phalaṃ pāpassa hi nāma vipāko iṭṭho kanto bhavissatīti aṭṭhānametaṃ. Aguṇe ratoti tathā hesa idāni akusalakamme rato. Ujumagganti dasa kusalakammapathamaggaṃ pahāya. Kummagganti nirayagāmiṃ dasa akusalakammapathamaggaṃ anudhāvati. Ohite tulamaṇḍaleti bhaṇḍasampaṭicchanatthāya tulāmaṇḍale laggetvā ṭhapite. Unanmetīti uddhaṃ ukkhipati. Ācinanti thokaṃ thokaṃ puññaṃ ācinanto pāpabhāraṃ otāretvā naro kalyāṇakammasīsaṃ ukkhipitvā devalokaṃ gacchati. Saggātimānoti sagge atimāno saggasampāpake sātaphale kalyāṇakamme abhirato. Saggādhimānotipi pāṭho. Saggaṃ adhikāraṃ katvā ṭhitacittoti attho. Sātave ratoti esa vījakadāso sātave madhuravipāke kusalakammeyeva rato so imassa pāpakammassa khīṇakāle kalyāṇakammassa phalena devaloke nibbattissati. Yaṃ panesa idāni dāsattaṃ upagato neva taṃ kalyāṇakammassa phalena tathattasaṃvattanikaṃ hissa pubbe kataṃ pāpaṃ bhavissatīti niṭṭhamettha gantabbanti.