rattindivo ca so dibyo mānusiṃ saradosataṃ
iti kammāni anventi asaṃkheyyāpi jātiyo
kalyāṇaṃ yadivā pāpaṃ na hi kammaṃ vinassatīti.
Tattha dasannesūti dasannaraṭṭhe. Pasūti goṇo. Ahunti ahosiṃ. Nilucchitoti vacchakakāleyeva maṃ evaṃ manāpo bhavissatīti nibbījamakaṃsu. Sohaṃ nilucchito uddhatavījova javo bhadro ahosiṃ. Vajjīsu kulamāgatoti goyonito cavitvā vajjīraṭṭhe ekasmiṃ Mahābhogakule nibbattamhīti dasseti. Nevitthī na pumāti napuṃsakattaṃ sandhāyāha. Bhavane tāvatiṃsāhanti tāvatiṃsabhavane ahaṃ. Tattha ṭhitāhaṃ vedeha sarāmi jātiyo imāti sā kira tasmiṃ devaloke ṭhitā ahaṃ evarūpaṃ devalokaṃ āgacchantī kuto nu kho āgatāti olokentī vajjīraṭṭhe mahābhogakule napuṃsakattabhāvato cavitvā tattha nibbattabhāvaṃ passi. Tato kena nu kho kammena evarūpe ramaṇīyaṭṭhāne nibbattamhīti olokentī kosambiyaṃ seṭṭhikule nibbattitvā katadānādīni kusalāni disvā etassa phalena nibbattamhīti ñatvā anantarātīte napuṃsakattabhāve nibbattamānā kuto āgatamhīti olokentī dasannaraṭṭhesu goyoniyaṃ mahādukkhassa anubhūtabhāvaṃ aññāsi. Tato anantaraṃ jātiṃ anussaramānā vānarayoniyaṃ uddhataphalabhāvaṃ addasa. Tato anantaraṃ anussarantī bhinnāgakaraṭṭhe chakalayoniyaṃ uddhatavījabhāvaṃ anussari. Tato anantaraṃ anussaramānā roruve nibbattabhāvaṃ anussari. Athassā niraye pacanabhāvañca tiracchānayoniyaṃ anubhūtaṃ dukkhañca anussarantiyā bhayaṃ uppajji. Tato kena nu kho kammena evarūpaṃ dukkhaṃ anubhūtaṃ mayāti chaṭṭhaṃ jātiṃ olokentī tāya jātiyā kosambinagare katakalyāṇakammaṃ disvā sattamaṃ olokentī magadharaṭṭhe pāpasahāyaṃ nissāya kataparadārakammaṃ disvā etassa phalena taṃ me mahādukkhaṃ anubhūtanti aññāsi. Athāhaṃ ito cavitvā anāgate kuhiṃ nibbattissāmīti olokentī yāvatāyukaṃ ṭhatvā puna sakkasseva paricārikā hutvā nibbattissāmīti aññāsi. Evaṃ punappunaṃ Olokiyamānā tatiyepi attabhāve sakkasseva paricārikā hutvā nibbattissāmīti. Tathā catutthe pañcame pana tasmiṃyeva devaloke javanadevaputtassa aggamahesī hutvā nibbattissāmīti ñatvā tato anantaraṃ olokentī chaṭṭhe attabhāve ito tāvatiṃsabhavanato cavitvā aṅgatirañño aggamahesiyā kucchismiṃ nibbattissāmi rucāti me nāmaṃ bhavissatīti ñatvā tato anantaraṃ kuhiṃ nibbattissāmīti olokentī sattamāya jātiyā tato cavitvā tāvatiṃsabhavane mahiddhiko devaputto hutvā nibbattissāmi itthībhāvato muñcissāmīti aññāsi. Tasmā āha tattha ṭhitāhaṃ vedeha sarāmi satta jātiyo anāgatepi satteva yā gamissaṃ ito cutāti. Pariyāgatanti pariyāyena attano vārena āgataṃ. Satta jaccāti vajjīraṭṭhe napuṃsakajātiyā saddhiṃ devaloke pañca ayañca chaṭṭhāti satta jātiyo vuccanti. Etā satta jātiyo niccaṃ sakkatapūjitā ahosinti dasseti. Chaṭṭhāva gatiyoti devaloke pañca ayañca ekāti imā cha gatiyo itthībhāvā na muñcissanti vadati. Sattamī cāti tato cavitvā anantaraṃ. Santānamayanti ekato vaṇṭikādivasena katasantānaṃ ganthenti yathā santānamayā honti. Evaṃ ajjāpi mama paricārikāyo nandanavane me cutibhāvaṃ ajānantā mamatthāya mālaṃ ganthentiyeva. So me mālaṃ paṭicchatīti mahārāja anantarajātiyā mama sāmiko javo nāma devaputto yo rukkhato pātitaṃ mālaṃ paṭicchati. Soḷasāti mahārāja mama jātiyā idāni soḷasavassāni ettako pana kālo Devānaṃ eko muhutto viya. Tena tā pana mama cutibhāvaṃpi ajānantā mamatthāya mālaṃ ganthentiyeva. Mānusinti manussānaṃ vassagaṇanaṃ āgamma. Saradosatanti vassasataṃ hoti. Evaṃ dīghāyukā devā iminā kāraṇena paralokassa ca kalyāṇapāpakānañca kammānaṃ atthitaṃ jānāhi devāti. Anventīti yathā maṃ anubandhiṃsu evaṃ anubandhanti. Na hi kammaṃ vinassatīti diṭṭhadhammavedanīyaṃ tasmiṃyeva attabhāve upapajjavedanīyaṃ anantarattabhāve vipākaṃ deti aparāpara vedanīyaṃ pana vipākaṃ adatvā na nassati. Taṃ sandhāya na hi kammaṃ vinassatīti vatvā deva ahaṃ paradārakammassa nissandena niraye pacitvā tiracchānayoniyañca mahantaṃ dukkhaṃ anubhaviṃ sace tumhepi idāni guṇassa kathaṃ gahetvā evaṃ karissatha mayā anubhūtasadisameva dukkhaṃ anubhavissatha tasmā mā evaṃ akaritthāti āha.