atītamaddhā aparādhitaṃ mayā

ācikkha me nārada suddhimaggaṃ

yathā ahaṃ no nirayaṃ pateyyanti.

Tattha bhayasānutappāmīti attanā katassa pāpassa bhayena anutappāmi. Mahā ca me bhayāti mahantañca me nirayabhayaṃ uppannaṃ. Dīpaṃvogheti dīpaṃ viya oghe. Idaṃ vuttaṃ hoti āditte kāye vārimajjhaṃ viya bhinnanāvānaṃ oghe vā aṇṇave vā patiṭṭhaṃ alabhamānānaṃ dīpaṃ viya andhakāre gatānaṃ pajjoto viya tvaṃ no ise saraṇaṃ bhava. Atītamaddhā aparādhitaṃ mayāti ekaṃsena mayā atītakammaṃ aparādhitaṃ kusalaṃ atikkamitvā akusalameva katanti.