āsīnaṃ dāyapassasmiṃ isisaṅghapurakkhataṃ.

Kaṃ gatiṃ pecca gacchanti narā dhammāticārino

aticiṇṇo mayā dhammo taṃ me akkhāhi pucchitoti .

Tattha disvāti bhikkhave so uyyānapālo rājānaṃ rājasabhāyaṃ nisinnaṃ disvā athassa paṭivedesi. Yassāsīti vadanto ārocesīti attho. Yassāsīti mahārāja yassa tvaṃ anukampako muducitto āsi. Yassa abhiṇhaṃ vaṇṇaṃ payirudāhāsi so ayaṃ saṃkicco isīnaṃ antare sādhu laddhakoti sammato anuppatto tava uyyāne silāpaṭṭe isigaṇaparivuto kāñcanapaṭimā viya nisinno. Taramānarūpoti mahārāja pabbajitā nāma kule vā gaṇe vā alaggā tumhākaṃ gacchantānaññeva pakkameyyuṃ tasmā taramānarūpo khippaṃ niyyāhi mahantānaṃ sīlādiguṇānaṃ esitattāpassa mahesinanti. Tatoti bhikkhave so rājā tassa vacanaṃ sutvā tato tassa vacanato anantarameva. Nikkhippāti nikkhipitvā tassa kira uyyānadvāraṃ patvāva etadahosi Pabbajitā nāma garuṭṭhāniyā saṃkiccatāpasassa santikaṃ uddhatavesena gantuṃ ayuttanti. So maṇicittasuvaṇṇadaṇḍañca bālavījaniṃ kāñcanamayaṃ uṇhīsapaṭaṃ suparikkhittaṃ maṅgalakhaggaṃ setacchattaṃ suvaṇṇapādukāti imāni pañca rājakakudhabhaṇḍāni apanetvā tena vuttaṃ nikkhippāti. Paṭicchadanti tameva rājakakudhabhaṇḍaṃ ṭhapayitvā bhaṇḍāgārikassa hatthe datvā. Dāyapassasminti evaṃnāmake uyyāne. Atha kālaṃ amaññathāti atha so idāni pañhaṃ pucchituṃ kāloti jānāti. Pāliyaṃ pana yathākālanti. Āgatassa kālānurūpena pañhapucchanaṃ amaññathāti attho. Paṭipajjathāti paṭipajji. Peccāti paṭigantvā paralokassa vā nāmametaṃ tasmā paralokanti attho. Mayāti bhante mayā sucaritadhammo atikkanto pitughāṭakammaṃ kataṃ taṃ me akkhāhi kaṃ gatiṃ pitughāṭakā gacchanti katarasmiṃ niraye paccantīti pucchati.