Idāni ye rājāno tathārūpe āsādetvā taṃ taṃ dukkhaṃ pattā te dassetuṃ atikāyoti ādimāha. Tattha atikāyoti balasampanno mahākāyo. Mahissāsoti dhanuggaho. Sahassabāhūti pañcahi dhanuggahasatehi bāhusahassehi āropetabbaṃ dhanuṃ āropanasamatthatāya sahassabāhu. Kekakādhipoti kekakaraṭṭhādhipati. Vibhavaṅgatoti Vināsaṃ patto. Vatthūni sarabhaṅgajātake vitthāritāni. Upahacca mananti attano cittaṃ padūsetvā. Mātaṅgasminti mātaṅgapaṇḍite. Vatthu mātaṅgajātake vaṇṇitaṃ. Kaṇhadīpāyanāsajjāti kaṇhadīpāyanaṃ āsajja. Yamasādhananti nirayaṃ. Vatthu ghaṭajātake vitthāritaṃ. Isināti kapilatāpasena. Pāvekkhīti paviṭṭho. Ceccoti cetiyarājā. Hīnattoti parihīnattabhāvo antarahitā iddhi. Kālapariyāyanti pariyāyamaraṇakālaṃ patvā. Vatthu cetiyajātake kathitaṃ. Tasmāti yasmā cittavasiko hutvā isīsu aparajjhitvā aṭṭhasu mahānirayesu paccati. Tasmā hi chandāgamananti chandādicatubbidhaṃpi agatigamanaṃ. Paduṭṭhenāti kuddhena. Gantvā so nirayaṃ adhoti so tena adhogamanīyena kammena adhonirayameva gacchati. Pāliyaṃ pana nirayussadanti likhitaṃ. Tassa ussadanirayaṃ gacchatīti attho. Vuḍḍheti vayovuḍḍhe ca guṇavuḍḍhe ca. Anapaccāti bhavantarepi apaccaṃ vā dāyādaṃ vā na labhantīti attho. Tālavatthūti diṭṭhadhammepi chinnamūlatālo viya mahāvināsaṃ patvā nirayesu nibbattanti. Hantīti māreti. Ciraṃ rattāyāti ciraṃ kālaṃ.
Evaṃ mahāsatto isiviheṭhakānaṃ paccananiraye dassetvā upari adhammikarājūnaṃ paccananiraye dassenato yo cāti ādimāha. Tattha raṭṭhaṃ viddhaṃsanoti chandādivasena gantvā raṭṭhassa viddhaṃsano. Accisaṅghapareto soti accisamūhaparikkhitto. Tejobhakkhassāti aggimeva khādantassa. Gattānīti tigāvute sarīrasabbaṅgapaccaṅgāni. Lomaggehi ca nakhehi cāti etehi saddhiṃ sabbāni ekajālāni honti. Tuṇḍadditoti āneñjanakāraṇaṃ kāriyamāno tuṇḍehi viddho nāgo yathā nadati.
Evaṃ mahāsatto adhammikarājūnaṃ paccananiraye dassetvā idāni pitughāṭakādīnaṃ paccananiraye dassetuṃ yo lobhāti ādimāha. Tattha lobhāti yasadhanalobhena. Dosāti duṭṭhacittatāya. Nittacanti lohakumbhiyaṃ bahūni vassasahassāni pakkaṃ nīharitvā tigāvutamassa sarīraṃ nittacaṃ katvā jalitāya lohapaṭhaviyā pātetvā tiṇhehi ayasūlehi koṭṭentā cuṇṇavicuṇṇaṃ karonti. Andhaṃ karitvāti mahārāja taṃ pitughāṭakaṃ nirayapālā jalitalohapaṭhaviyaṃ uttānaṃ pātetvā jalitehi ayasūlehi akkhīni bhinditvā andhaṃ karitvā mukhe uṇhaṃ muttakarīsaṃ pakkhipitvā palālapīṭhaṃ viya naṃ saṃvaṭṭetvā kappena saṇṭhite khāre lohaudake nimujjāpenti. Tattaṃ pakkuṭṭhitamayoguḷañcāti puna pakkuṭṭhitagūthakalalañceva jalitaayoguḷañca khādāpenti. So pana taṃ āhariyamānaṃ disvā mukhaṃ pitheti. Athassa dīghepi aggatāpite jalamāne jāle ādāya mukhaṃ vikkhambhitvā vivaritvā rajjubandhaṃ ayabalisaṃ khipitvā jivhaṃ nīharitvā tasmiṃ vivaṭṭe mukhe taṃ ayoguḷaṃ saṃsavayanti pakkhipanti. Rakkhasāti nirayapālā. Sāmā cāti mahārāja tassa pitughāṭakassa jivhaṃ balisena nikkaḍḍhitvā ayasaṅkunāhi paṭhaviyaṃ nīhataṃ jivhaṃ sāmā soṇā savalavaṇṇā sunakhā ca lohatuṇḍā gijjhā ca kākolasaṅghā ca aññe ca nānappakārā sakuṇā samāgantvā āvudhehi chindantā viya Vibhajja kākapadākārena koṭṭhāse katvā. Vipphandamānanti visandamānalohitaṃ vighāsaṃ khādantā viya satte bhakkhayantīti attho. Taṃ daḍḍhakāḷanti taṃ pitughāṭakaṃ jhāyamānaṃ kāḷaṃ viya daḍḍhajalitasarīraṃ. Paribhinnagattanti tattha tattha bhinnagattaṃ. Nippothayantāti jalitehi ayamuggarehi paharantā. Ratī hi tesanti tesaṃ nirayapālānaṃ sā rati kīḷā hoti. Dukkhino panītareti itare pana nerayikasattā dukkhitā honti . pettighāṭinoti pitughāṭakā. Iti imaṃ pitughāṭakānaṃ paccananirayaṃ disvā rājā bhītatasito ahosi.