Eko kira sāvatthivāsī kulaputto sāsane uraṃ datvā pabbajito. Ekadivasaṃ sāvatthiyaṃ piṇḍāya caranto ekaṃ alaṅkataitthiṃ disvā subhanimittagahaṇavasena oloketvā kilesābhibhūto anabhirato vihāsi. Dīghakesanakho kiliṭṭhacīvaro upaṇḍūpaṇḍukajāto dhamanisaṇṭhatagatto. Yathā hi devaloke cavanadhammānaṃ devaputtānaṃ pañca pubbanimittāni paññāyanti mālā milāyanti vatthāni kilissanti sarīre dubbaṇṇiyaṃ okkamati ubhohi kacchehi sedā muñcanti devo devāsane nābhiramati evameva sāsanā cavanadhammānaṃ ukkaṇṭhitānaṃ bhikkhūnaṃ pañca pubbanimittāni paññāyanti saddhāpupphāni milāyanti sīlavatthāni kilissanti sarīre maṅkubhūtāya ceva ayasavasena ca dubbaṇṇiyaṃ okkamati kilesasedā muñcanti araññe rukkhamūle suññāgāre nābhiramanti. Tassa nimittāni paññāyiṃsu. Atha naṃ bhikkhū satthu santike netvā ayaṃ bhante bhikkhu ukkaṇṭhitoti dassesuṃ. Satthā saccaṃ kira tvaṃ bhikkhu ukkaṇṭhitosīti pucchitvā Saccaṃ bhanteti vutte mā bhikkhu kilesavasiko hohi mātugāmo nāmesa pāpo tasmiṃ paṭibaddhacittaṃ vinodehi sāsane abhirama mātugāme paṭibaddhacittatāya hi tejavantopi hāyanti porāṇakapaṇḍitā mātugāmena nittejā hutvā anayabyasanaṃ pāpuṇiṃsūti vatvā tuṇhī ahosi tehi yācito atītaṃ āhari.
Atīte mallaraṭṭhe kusāvatiyaṃ nāma rājadhāniyaṃ okkāko nāma rājā dhammena rajjaṃ kāresi. Tassa soḷasannaṃ itthīsahassānaṃ jeṭṭhakā sīlavatī nāma aggamahesī ahosi. Sā neva puttaṃ na dhītaraṃ labhi. Athassa nāgarā ceva raṭṭhavāsino ca rājanivesanadvāre sannipatitvā raṭṭhaṃ nassissati raṭṭhaṃ vinassissatīti upakkosiṃsu. Rājā sīhapañjaraṃ ugghāṭetvā mayi raṭṭhaṃ kārente adhammakāro nāma natthi kasmā upakkosathāti pucchi. Saccaṃ deva adhammakāro nāma natthi api ca vaṃsānurakkhito pana vo putto na vijjati aññe rajjaṃ gahetvā raṭṭhaṃ nāsessanti tasmā dhammena rajjaṃ kāretuṃ samatthaṃ puttaṃ patthethāti. Puttaṃ patthento kiṃ karomīti. Paṭhamantāva ekaṃ sattāhaṃ cullanāṭakaṃ dhammanāṭakaṃ katvā visajjetha sace sā puttaṃ labhissati sādhu no ce labhissati atha majjhimanāṭakaṃ visajjetha tato jeṭṭhanāṭakaṃ avassaṃ ettakāsu itthīsu ekāpi puññavatī itthī puttaṃ labhissatīti. Rājā tesaṃ vacanena tathā katvā satta divase yathāsukhaṃ abhiramitvā āgatāgataṃ pucchi kacci vo putto laddhoti. Sabbā itthiyo na labhāma Devāti āhaṃsu. Rājā na me putto uppajjissatīti anattamano ahosi. Nāgarā puna tatheva upakkosayiṃsu. Rājā kiṃ upakkosatha mayā tumhākaṃ vacanena nāṭakāni visajjitāni ekāpi puttaṃ na labhati idāni kiṃ karomāti āha. Deva tā dussīlā bhavissanti nippuññā natthi etāsaṃ puttapaṭilābhāya puññaṃ tumhe etāsu puttaṃ alabhantīsu mā appossukkattaṃ āpajjatha aggamahesī vo sīlavatī devī sīlasampannā taṃ visajjetha tassā putto uppajjissatīti. So sādhūti sampaṭicchitvā ito kira sattame divase rājā sīlavatiṃ deviṃ dhammanāṭakaṃ katvā visajjessati purisā sannipatantūti bheriñcārāpetvā sattame divase deviṃ alaṅkārāpetvā rājanivesanā otāretvā visajjesi. Tassā sīlatejena sakkassa bhavanaṃ uṇhākāraṃ dassesi. So kinnu khoti āvajjento deviyā puttaṃ patthanabhāvaṃ ñatvā etissā mayā puttaṃ dātuṃ vaṭṭatīti atthi nukho devaloke etissā anucchaviko puttoti upadhārento bodhisattaṃ addasa.