So kira tadā tāvatiṃsabhavane āyuṃ khepetvā upari devaloke nibbattitukāmo ahosi. Sakko tassa vimānadvāraṃ gantvā taṃ pakkositvā mārisa tayā manussalokaṃ gantvā okkākarañño aggamahesiyā kucchismiṃ paṭisandhiṃ gaṇhituṃ vaṭṭatīti sampaṭicchāpetvā aparaṃpi devaputtaṃ tvaṃpi etissā putto bhavissasīti vatvā mā kho panassā koci sīlaṃ bhindatūti mahallakabrāhmaṇavesena rañño Nivesanadvāraṃ agamāsi. Mahājanopi nahātvā alaṅkato ahaṃ deviṃ gaṇhissāmi ahaṃ deviṃ gaṇhissāmīti rājadvāre sannipatitvā sakkañca disvā tvaṃ kasmā āgatosīti parihāsamakāsi. Sakko kiṃ maṃ tumhe garahatha sacepi me sarīraṃ jiṇṇaṃ rāgo pana na jīrati sace sīlavatiṃ labhissāmi ādāya naṃ gamissāmīti āgatomhīti vatvā attano ānubhāvena sabbesaṃ puratova aṭṭhāsi. Añño tassa tejena purato bhavituṃ nāsakkhi. So taṃ sabbālaṅkārapaṭimaṇḍitaṃ nivesanā nikkhamantiṃyeva hatthe gahetvā pakkāmi. Atha naṃ tattha tattha ṭhitā garahiṃsu passatha bho mahallakabrāhmaṇo evaṃ uttamarūpadharaṃ deviṃ ādāya gacchati attano yuttaṃ na jānātīti. Devīpi mahallako maṃ ādāya gacchatīti na aṭṭiyati na harāyati. Rājāpi vātapāne ṭhatvā ko nukho deviṃ gahetvā gacchatīti olokento taṃ disvā anattamano ahosi. Sakko taṃ ādāya nagaradvārato nikkhamitvā dvārasamīpe ekaṃ gharaṃ māpesi vivaṭadvāraṃ paññattakaṭṭhattharikaṃ katvā. Atha naṃ sā idaṃ vo nivesananti pucchi. So āma bhadde pubbe pana ahaṃ eko idānimhā mayaṃ dve janā ahaṃ bhikkhāya caritvā taṇḍulādīni āharissāmi tvaṃ imissā kaṭṭhattharikāya nipajjāhīti vatvā taṃ mudunā hatthena parāmasanto dibbasamphassaṃ pharāpetvā tattha nipajjāpesi. Sā dibbasamphassapharaṇena saññaṃ visajjesi. Atha naṃ attano ānubhāvena tāvatiṃsabhavanaṃ netvā alaṅkatavimāne dibbasayane Nipajjāpesi. Sā sattame divase pabujjhitvā taṃ sampattiṃ disvā na so brāhmaṇo manusso sakko bhavissatīti aññāsi.
Sakkopi tasmiṃ samaye pārichattakamūle dibbanāṭakaparivuto nisinnova ahosi. Sā taṃ disvā sayanā vuṭṭhāya tassa santikaṃ gantvā vanditvā ekamantaṃ aṭṭhāsi. Atha naṃ sakko varaṃ te devi dassāmi gaṇhāhīti āha. Tenahi deva ekaṃ puttaṃ me dehīti. Devi tiṭṭhatu eko putto ahante dve putte dassāmi tesu pana eko paññavā bhavissati na rūpavā eko rūpavā na paññavā tesu kataraṃ paṭhamaṃ icchasīti. Paññavantaṃ devāti. So sādhūti vatvā tassā kusatiṇaṃ dibbavatthaṃ dibbacandanaṃ dibbapārichattakapupphaṃ kokanadañca nāma vīṇaṃ datvā taṃ ādāya rañño sayanagharaṃ pavisitvā raññā saddhiṃ ekasayane nipajjāpetvā aṅguṭṭhakena tassā nābhiṃ parāmasi. Tasmiṃ khaṇe bodhisatto tassā kucchiyaṃ paṭisandhiṃ gaṇhi. Sakkopi sakaṭṭhānameva gato. Paṇḍitattā devī gabbhassa patiṭṭhitabhāvaṃ aññāsi. Atha naṃ pabuddho rājā disvā devi kena nītāsīti pucchi. Sakkena devāti. Ahaṃ paccakkhato ekaṃ mahallakabrāhmaṇaṃ taṃ ādāya gacchantaṃ addasaṃ kasmā maṃ vañcesīti. Saddahatha deva sakko maṃ gahetvā devalokaṃ netīti. Na saddahāmi devīti. Athassa sā sakkadattiyaṃ kusatiṇaṃ dassetvā saddahāti āha. Rājā kusatiṇaṃ nāma yato kutoci labbhatīti na saddahi. Athassa sā dibbavatthādīni dassesi. Rājā tāni disvā saddahitvā bhadde Sakko tāva taṃ netu putto pana te laddho na laddhoti pucchi. Laddho mahārāja gabbho me patiṭṭhitoti. So sutvā tuṭṭho tassā gabbhaparihāraṃ adāsi. Sā dasamāsaccayena puttaṃ vijāyi. Tassa aññaṃ nāmaṃ akatvā kusatiṇannāmameva akaṃsu. Kusakumārassa padasā gamanakāle itaro devaputto tassā kucchismiṃ paṭisandhiṃ gaṇhi. Sā dasamāse paripuṇṇe puttaṃ vijāyi. Tassa jayampatīti nāmaṃ kariṃsu. Te mahantena yasena vaḍḍhiṃsu. Bodhisatto paññavā ācariyassa santike kiñci sippaṃ anuggahetvā attano paññāya sabbasippesu nipphattiṃ pāpuṇi.