Athassa soḷasavassakāle rājā rajjaṃ dātukāmo deviṃ āmantetvā bhadde puttassa te rajjaṃ datvā nāṭakāni upaṭṭhapessāma jīvantāyeva taṃ rajje patiṭṭhitaṃ passissāma sakalajambūdīpe kho pana yassa rañño dhītaraṃ icchati tamassa ānetvā aggamahesiṃ karissāma cittamassa jānāhi kataraṃ rājadhītaraṃ rocesīti āha. Sā sādhūti sampaṭicchitvā kumārassa imaṃ pavuttiṃ ārocetvā cittaṃ jānāhīti ekaṃ paricārikaṃ pesesi. Sā gantvā tassa pavuttiṃ ārocesi. Taṃ sutvā mahāsatto cintesi ahaṃ na rūpavā rūpasampannā rājadhītā ānītāpi maṃ disvā kiṃ me iminā virūpenāti palāyissati iti no lajjitabbaṃ bhavissati kiṃ me gharāvāsena dharamāne mātāpitaro upaṭṭhahitvā tesaṃ accayena nikkhamitvā pabbajissāmīti. So mayhaṃ neva rajjena attho na nāṭakehi ahaṃ Mātāpitūnaṃ accayena pabbajissāmīti āha. Sā sutvā āgantvā tassa kathaṃ deviyā ārocesi. Devīpi rañño ārocesi. Rājā taṃ sutvā anattamano hutvā puna katipāhaccayena sāsanaṃ pesesi. Sopi paṭibāhatiyeva. Evaṃ yāvatatiyampi paṭibāhitvā catutthavāre cintesi mātāpitūhi saddhiṃ ekantena paṭipakkhabhāvo nāma na yutto upāyaṃ karissāmīti. So kammārajeṭṭhakaṃ pakkosāpetvā bahuṃ suvaṇṇaṃ datvā ekaṃ itthīrūpakaṃ karohīti taṃ uyyojetvā tasmiṃ pakkante aññaṃ suvaṇṇaṃ gahetvā sayaṃ itthīrūpakaṃ akāsi. Bodhisattānaṃ pana adhippāyo nāma samijjhati. Taṃ suvaṇṇarūpakaṃ jivhāya avaṇṇiyasobhaṃ ahosi. Atha naṃ mahāsatto khomaṃ nivāsāpetvā sirigabbhe ṭhapāpesi. So kammārajeṭṭhakena ābhataṃ rūpakaṃ disvā taṃ garahitvā gaccha amhākaṃ sirigabbhe ṭhapitarūpakaṃ āharāti āha. So sirigabbhaṃ pavisitvā taṃ disvā kumārena saddhiṃ abhiramituṃ ekā devaccharā āgatā bhavissatīti hatthaṃ pasāretuṃ avisahanto nikkhamitvā kāva sirigabbhe ayyā ekikāva ṭhitā upagantuṃ na sakkomīti āha. Tāta gaccha suvaṇṇarūpakaṃ etaṃ mayā kataṃ āharāti puna pesesi. So āhari . Kumāro kammārena kataṃ rūpakaṃ suvaṇṇagabbhe khipāpetvā attanā kataṃ alaṅkārāpetvā rathe ṭhapāpetvā mātu santikaṃ pahiṇi sace evarūpā itthī atthi ghare vasissāmīti.