Sā amacce pakkosāpetvā tātā mayhaṃ putto mahāpuñño sakkadattiyo anucchavikaṃ kumārikaṃ labhissati tumhe evarūpaṃ labhantā gaṇhissatha imaṃ rūpakaṃ paṭicchannayāne ṭhapetvā sakalajambūdīpaṃ carantā yassa rañño evarūpaṃ dhītaraṃ passatha tasseva taṃ datvā okkākarājā tumhehi saddhiṃ āvāhavivāhaṃ karissatīti divasaṃ vavatthapetvā āgacchathāti āha. Te sādhūti taṃ ādāya mahantena parivārena nikkhamitvā vicarantā yaṃ rājadhāniṃ pāpuṇanti tattha sāyaṇhasamaye mahājanassa samosaraṇaṭṭhāne taṃ rūpakaṃ vatthapupphālaṅkārehi alaṅkaritvā suvaṇṇasivikaṃ āropetvā titthamagge ṭhapetvā sayaṃ paṭikkamitvā āgatāgatānaṃ kathāsavanatthaṃ ekamantaṃ tiṭṭhanti. Mahājano taṃ oloketvā suvaṇṇarūpakanti saññaṃ akatvā ayaṃ manussitthī samānāpi devaccharapaṭibhāgā ativiya sobhati kinnu kho ettha ṭhitā kuto vā āgatā amhākaṃ nagare evarūpā natthīti vaṇṇentā pakkamanti. Taṃ sutvā amaccā sace idha evarūpā dārikā bhaveyya asukā rājadhītā viya asukā amaccadhītā viyāti vadeyyuṃ addhā idha evarūpā natthīti taṃ ādāya aññaṃ nagaraṃ gacchanti. Te evaṃ vicarantā anupubbena maddaraṭṭhe sāgalanagaraṃ pāpuṇiṃsu. Tattha maddarañño aṭṭha dhītaro uttamarūpadharā devaccharapaṭibhāgā tāsaṃ sabbajeṭṭhakā pabhāvatī nāma tassā sarīrato bālasuriyassa pabhā viya pabhā niccharanti. Andhakārepi catuhatthe gabbhe padīpakiccaṃ natthi. Sabbo gabbho ekobhāsova hoti. Dhātī panassā khujjā. Sā pabhāvatiṃ bhojetvā tassā sīsaṃ nahāpanatthaṃ aṭṭhahi vaṇṇadāsīhi aṭṭha ghaṭe gāhāpetvā sāyaṇhasamaye udakaṭṭhānaṃ gacchantī titthamagge ṭhitaṃ taṃ rūpakaṃ disvā pabhāvatīti saññāya ayaṃ dubbinītā sīsaṃ nahāyissāmīti amhepi udakatthāya pesetvā paṭhamataraṃ āgantvā titthamagge ṭhitāti kujjhitvā are kulalajjāpanake purimataraṃ āgantvā idha ṭhitāsi sace rājā jānissati nāsessati noti vatvā hatthena gaṇḍapasse pahari. Hatthatalaṃ bhijjanappamāṇaṃ jātaṃ. Tato suvaṇṇarūpakanti ñatvā hasamānā vaṇṇadāsīnaṃ santikaṃ gacchantī passatha mama kammaṃ mama dhītāti saññāya pahāraṃ adāsiṃ ayaṃ mama dhītu santike kiṃ agghati kevalaṃ pana me hattho dukkhāpitoti āha.