Atha naṃ rājadūtā taṃ gahetvā tvaṃ mama dhītā ito abhirūpatarāti vadantī kiṃ nāma kathesīti. Maddarañño dhītā pabhāvatī nāma idaṃ rūpakaṃ tassā soḷasiṃpi kallaṃ na agghatīti. Te tuṭṭhamānasā rājadvāraṃ gantvā okkākarañño dūtā dvāre ṭhitāti paṭihāresuṃ. Rājā āsanā vuṭṭhāya ṭhitakova pakkosathāti āha. Te pavisitvā rājānaṃ vanditvā mahārāja amhākaṃ rājā tumhākaṃ ārogyaṃ pucchatīti vatvā katasakkārasammānā kimatthaṃ āgatatthāti puṭṭhā amhākaṃ rañño sīhassaro kusakumāro nāma putto rājā tassa rajjaṃ dātukāmo amhe tumhākaṃ santike pahiṇi tumhākaṃ kira dhītaraṃ pabhāvataṃ tassa detha imañca Suvaṇṇarūpakaṃ deyyadhammaṃ gaṇhathāti taṃ rūpakaṃ tassa adaṃsu. Sopi evarūpena mahārājena saddhiṃ vivāhamaṅgalaṃ bhavissatīti tuṭṭhacitto sampaṭicchi. Atha naṃ dūtā āhaṃsu mahārāja amhehi na sakkā papañcaṃ kātuṃ kumārikāya laddhabhāvaṃ rañño ārocessāma atha naṃ so āgantvā ādāya gamissatīti. So sādhūti sampaṭicchitvā tesaṃ sakkāraṃ katvā visajjesi. Te gantvā rañño ca deviyā ca ārocesuṃ. Rājā mahantena parivārena kusāvatito nikkhamitvā anupubbena sāgalanagaraṃ sampāpuṇi. Maddarājā pana paccuggamanaṃ katvā taṃ nagaraṃ pavesetvā mahantaṃ sakkāramakāsi. Sīlavatī devī paṇḍitattā ko jānāti kiṃ bhavissatīti ekāhadvīhatīhaccayena maddarājānaṃ āha mahārāja suṇisaṃ daṭṭhukāmamhīti. So sādhūti sampaṭicchitvā pakkosāpesi. Pabhāvatī sabbālaṅkārapaṭimaṇḍitā dhātīgaṇaparivutā āgantvā sassuṃ vandi. Sā taṃ disvā cintesi ayaṃ kumārikā abhirūpā mayhaṃ putto virūpo sace esā taṃ passissati ekāhaṃpi avasitvā palāyissati upāyaṃ karissāmīti. Sā maddarājānaṃ āmantetvā mahārāja suṇisā me puttassa anucchavikā apica kho pana amhākaṃ kulapaveṇiyā āgataṃ cārittaṃ atthi sace ayaṃ etasmiṃ cāritte vattissati nessāmi nanti āha. Kiṃ pana vo cārittanti āha. Amhākaṃ vaṃse yāva ekassa gabbhassa patiṭṭhānaṃ hoti tāva divā sāmikaṃ passituṃ na labhati sace esā tathā karissati nessāmi nanti. Rājā kiṃ Amma sakkhassasi evaṃ vattitunti dhītaraṃ pucchi. Sā āma tātāti āha.