Sā pañcavidhapadumasañchannaṃ pokkharaṇiṃ disvā nahāyitukāmā paricārikāhi saddhiṃ pokkharaṇiṃ otaritvā kīḷantī taṃ padumaṃ disvā vicinitukāmā hatthaṃ pasāresi. Atha naṃ rājā paduminipattaṃ apanetvā ahaṃ kusarājāti hatthe gaṇhi. Sā tassa mukhaṃ disvā yakkho maṃ gaṇhatīti viravitvā tattheva visaññitaṃ pattā. Athassā rājā hatthaṃ muñci. Sā saññaṃ paṭilabhitvā kusarājā kira maṃ hatthe gaṇhati iminā cāhaṃ hatthisālāyaṃ hatthichakaṇapiṇḍena paharitvā assasālāyaṃ assachakaṇapiṇḍena pahatā ayameva ca mayhaṃ hatthissa pacchimāsane nisīditvā upphaṇḍesi kiṃ me evarūpena dummukhena patinā imaṃ jahitvā ahaṃ jīvantī aññaṃ patiṃ labhissāmīti cintetvā attanā saddhiṃ āgate amacce pakkosāpetvā mama yānavāhanasajjaṃ karotha ajjeva gamissāmīti āha. Te rañño ārocesuṃ rājā cintesi sace gantuṃ na labhissati hadayamassā phalissati gacchatu puna taṃ attano balena nessāmīti cintetvā athassā gamanaṃ anujānāti. Sā pitu nagarameva agamāsi. Mahāsattopi uyyānato nagaraṃ pavisitvā alaṅkatapāsādaṃ abhiruhi. Bodhisattaṃ hi sā pubbapatthanāvasena na icchi. Sopi pubbakammavasena virūpo ahosi.
Atīte kira bārāṇasiyaṃ dvāragāme uparimavīthiyā ca Heṭṭhimavīthiyā ca dve kulāni vasiṃsu. Ekassa kulassa dve puttā ahesuṃ. Ekassekāva dhītā ahosi. Dvīsu puttesu bodhisatto kaniṭṭho. Taṃ kumārikaṃ jeṭṭhakassa ānesuṃ. Kaniṭṭho adārabharaṇo bhātu santikeyeva vasi. Athekadivasaṃ tasmiṃ ghare atirasakapūve paci. Bodhisatto araññaṃ gato ahosi. Tassa pūvaṃ ṭhapetvā avasese bhājetvā khādiṃsu. Tasmiṃ khaṇe paccekabuddho bhikkhāya gharadvāraṃ agamāsi. Bodhisattassa bhātu jāyā cullapatino aññaṃ pūvaṃ pacissāmīti taṃ gahetvā paccekabuddhassa adāsi. Sopi taṃ khaṇaññeva araññato āgacchi. Atha naṃ sā āha sāmi cittaṃ pasādehi tava koṭṭhāso paccekabuddhassa dinnoti. So tava koṭṭhāsaṃ khāditvā mama koṭṭhāsaṃ desi ahaṃ kiṃ khādissāmīti kuddho paccekabuddhaṃ anugantvā pattato pūvaṃ gaṇhi. Sā mātu gharaṃ gantvā navavinilīnaṃ campakapupphavaṇṇaṃ sappiṃ āharitvā paccekabuddhassa pattaṃ pūresi. Taṃ obhāsaṃ muñci. Sā taṃ disvā patthanaṃ paṭṭhapesi bhante nibbattaṭṭhāne me sarīraṃ obhāsajātaṃ hotu uttamarūpadharā bhaveyyaṃ iminā ca me asappurisena saddhiṃ ekaṭṭhāne vāso mā ahosīti. Iti sā pubbapatthanāya vasena taṃ na icchi. Bodhisattopi taṃ pūvaṃ tasmiṃ sappipatte osīdāpetvā patthanaṃ paṭṭhapesi bhante imaṃ yojanasateva santaṃpi ānetvā mama pādaparicārikaṃ kātuṃ samattho bhaveyyanti. Tattha yaṃ so kuddho pūvaṃ Gaṇhi tassa pubbakammassa vasena virūpo ahosi.