gacchāmahaṃ yattha piyā pabhāvatīti.

Tattha sayogganti hatthiyoggādisahitaṃ. Sakāyuranti sapañcarājakakudhabhaṇḍaṃ. Anusāsa ammāti so kira purisassa rajjaṃ datvā puna gaṇhanaṃ nāma ayuttanti pitu vā bhātu vā aniyyādetvā mātuyā niyyādento evamāha.

Sā tassa kathaṃ sutvā tenahi tāta appamatto bhaveyyāsi mātugāmo hi nāma aparisuddhahadayoti vatvā nānaggarasabhojanassa suvaṇṇakaroṭiṃ pūretvā idaṃ antarāmagge bhuñjeyyāsīti vatvā uyyojesi. So taṃ ādāya mātaraṃ vanditvā tikkhattuṃ padakkhiṇaṃ katvā jīvanto puna tumhe passissāmīti vatvā sirigabbhaṃ pavisitvā pañcāvudhaṃ sannayhitvā bhattakaroṭiyā saddhiṃ kahāpaṇasahassaṃ Pasibbake katvā kokanadañca vīṇaṃ ādāya nagarā nikkhamitvā maggaṃ paṭipajjitvā mahabbalo mahāthāmo yāva majjhantikā paṇṇāsa yojanāni gantvā bhattaṃ bhuñjitvā sesadivasabhāgena puna paṇṇāsa yojanāni gantvā ekāheneva yojanasatikaṃ maggaṃ khepetvā sāyaṇhasamaye nahāyitvā sāgalanagaraṃ pāvisi. Tasmiṃ paviṭṭhamatteyeva bodhisattassa tejena pabhāvatī sayanapiṭṭhe saṇṭhāretuṃ asakkontī otaritvā bhūmiyaṃ nipajji. Bodhisattaṃ kilantindriyaṃ vīthiyaṃ gacchantaṃ aññatarā itthī disvā pakkosāpetvā nisīdāpetvā pāde dhovāpetvā sayanaṃ dāpesi. So kilantakāyo nipajjitvā niddaṃ okkamati. Atha sā tasmiṃ niddūpagate nānaggarasabhojanaṃ sampādetvā taṃ pabodhetvā bhattaṃ bhojesi. So tuṭṭho tassā saddhiṃ bhattakaroṭiyā kahāpaṇasahassaṃ adāsi. So pañcāvudhaṃ tattheva ṭhapetvā gantabbaṭṭhānaṃ no atthīti vatvā vīṇaṃ ādāya hatthisālaṃ gantvā ajja me idha vasituṃ detha gandhabbaṃ vo karissāmīti vatvā hatthigopakehi anuññāto ekamante nipajjitvā thokaṃ niddāyitvā paṭipassaddhadaratho vuṭṭhāya vīṇaṃ muñcitvā sāgalanagaravāsino imaṃ saddaṃ suṇantūti vīṇaṃ vādento gāyi.

Pabhāvatī bhūmiyaṃ nipannā taṃ saddaṃ sutvāva ayaṃ na aññassa vīṇāsaddo nissaṃsayaṃ kusarājā mamatthāya āgatoti aññāsi. Maddarājāpi taṃ saddaṃ sutvā ativiya madhuraṃ vādeti sve etaṃ pakkosāpetvā mama gandhabbaṃ kāressāmīti cintesi. Bodhisatto Na sakkā idha vasamānena pabhāvatiṃ daṭṭhuṃ aṭṭhānametanti pātova nikkhamitvā sāyaṃ bhuttageheyeva pātarāsaṃ bhuñjitvā vīṇaṃ ṭhapetvā rājakumbhakārassa santikaṃ gantvā tassa antevāsikabhāvaṃ upagantvā ekadivaseneva gharaṃ mattikāya pūretvā bhājanāni karomi ācariyāti vatvā sādhu karohīti vutte ekaṃ mattikapiṇḍaṃ cakke ṭhapetvā cakkaṃ āvijjhi. Sakiṃ āvijjitameva yāva majjhantikātikkamā bhamiyeva. So nānāvaṇṇāni khuddakamahantāni bhājanāni katvā pabhāvatiyā atthāya bhājanaṃ karonto nānārūpāni samuṭṭhāpesi. Bodhisattānaṃ hi adhippāyo nāma samijjhati. Tāni rūpāni pabhāvatīyeva passatūti adhiṭṭhāsi. So sabbabhājanāni sukkhāpetvā pacitvā gehaṃ pūresi. Kumbhakāro tāni bhājanāni gahetvā rājakulaṃ agamāsi. Rājā tāni bhājanāni disvā kenīmāni katānīti pucchi. Mayā devāti. Ahaṃ tayā katāni jānāmi kathehi kena katānīti. Antevāsikena me katāni devāti. Na so antevāsiko ācariyo te hotu so tvaṃ tassa santike sippaṃ sikkha ito paṭṭhāya ca so mama dhītānaṃ bhājanāni karotu imañcassa sahassaṃ dehīti sahassaṃ dāpetvā imāni khuddakabhājanāni mama dhītānaṃ dehīti āha. So tāni tāsaṃ santikaṃ netvā imāni vo kīḷanatthāya khuddakabhājanānīti āha. Tā sabbā āgamiṃsu. Kumbhakāro mahāsattena pabhāvatiyā atthāya katabhājanameva tassā adāsi. Sā bhājanaṃ gahetvā tattheva Attano ca mahāsattassa ca khujjāya ca rūpaṃ passitvā idaṃ na aññena kataṃ kusarājeneva katanti ñatvā kujjhitvā bhūmiyaṃ khipitvā iminā mayhaṃ attho natthi icchantānaṃ dehīti āha. Athassā bhaginiyo kuddhabhāvaṃ ñatvā khuddakabhājanaṃ kusaraññā katanti maññasi na idantena kataṃ kumbhakārena kataṃ gaṇhāhi nanti avahasiṃsu. Sā tena katabhāvaṃ tassa ca āgatabhāvaṃ tāsaṃ na kathesi. Kumbhakāro sahassaṃ kahāpaṇaṃ bodhisattassa adāsi tāta rājā te tuṭṭho ito kira paṭṭhāya rājadhītānaṃ bhājanāni kareyyāsi ahaṃ tāsaṃ harissāmīti. So tāta nāhaṃ tāsaṃ karissāmīti āha. So idhāpi vasantena na sakkā pabhāvatiṃ daṭṭhunti taṃ sahassaṃ tasseva datvā rājūpaṭṭhākassa naḷakārassa santikaṃ gantvā tassa antevāsiko hutvā pabhāvatiyā atthāya tālapaṇṇaṃ katvā tattheva setacchattañca āpānabhūmiñca vatthañca gahetvā ṭhitaṃ pabhāvatiñcāti nānārūpāni dassesi. Naḷakāro tañca aññañca tena katabhaṇḍakaṃ ādāya rājakulaṃ agamāsi. Rājā disvā kenīmāni katānīti pucchi. Mayā devāti. Ahaṃ tayā katāni jānāmi kathehi kena katānīti. Antevāsikena me devāti. Na so antevāsiko ācariyo te hotu so tvaṃ tassa santike sippaṃ sikkha ito paṭṭhāya ca so mama dhītānaṃ evarūpāni karotu imañcassa sahassaṃ dehīti sahassaṃ datvā imāni alaṅkārabhaṇḍāni mama dhītānaṃ dehīti āha.