Sopi bodhisattena pabhāvatiyā atthāya kataṃ tālapaṇṇaṃ tassāyeva adāsi. Tatrāpi rūpāni añño jano na passati. Pabhāvatī pana disvā kusaraññā katabhāvaṃ ñatvā gaṇhitukāmā gaṇhantūti kuddhā bhūmiyaṃ khipi. Atha naṃ sesā avahasiṃsu. Naḷakāro sahassaṃ gahetvā bodhisattassa datvā taṃ pavuttiṃ ārocesi. So idaṃpi mayhaṃ avasanaṭṭhānanti sahassaṃ tasseva datvā rājamālākārassa santikaṃ gantvā antevāsikabhāvaṃ upagantvā nānāvidhaṃ mālāvikatiṃ ganthitvā pabhāvatiyā atthāya nānārūpavicitraṃ ekaṃ cumbitakaṃ akāsi. Mālākāro taṃ sabbaṃ ādāya rājakulaṃ agamāsi. Rājā disvā kenīmāni ganthitānīti pucchi. Mayā devāti. Ahaṃ tayā ganthitāni jānāmi kathehi kena ganthitānīti. Antevāsikena me devāti. Na so antevāsiko ācariyo te hotu so tvaṃ tassa santike sippaṃ sikkha ito paṭṭhāya ca so mama dhītānaṃ pupphāni ganthatu imañcassa sahassaṃ dehīti sahassaṃ datvā imāni pupphāni mama dhītānaṃ dehīti āha. Sopi bodhisattena pabhāvatiyā atthāya kataṃ cumbitakaṃ tassāyeva adāsi. Sā tattha attano ca rañño ca rūpehi saddhiṃ nānārūpāni disvā tena katabhāvaṃ ñatvā kujjhitvā bhūmiyaṃ khipi. Sesā bhaginiyo naṃ tatheva avahasiṃsu. Mālākāropi sahassaṃ āharitvā bodhisattassa datvā taṃ pavuttiṃ ārocesi. So idaṃpi mayhaṃ avasanaṭṭhānanti sahassaṃ tasseva datvā rañño sūdassa santikaṃ gantvā antevāsikabhāvaṃ upagacchi. Athekadivasaṃ sūdo rañño Bhojanavikatiṃ haranto attano atthāya pacituṃ bodhisattassa aṭṭhimaṃsaṃ adāsi. So taṃ tathā sampādesi yathāssa gandho sakalanagaraṃ avatthari. Rājā taṃ ghāyitvā kinte mahānase aññaṃpi maṃsaṃ pacasīti pucchi. Natthi deva apica kho pana me antevāsikassa aṭṭhimaṃsaṃ pacanatthāya dinnaṃ tasseva so gandho bhavissatīti. Rājā āharāpetvā tato thokaṃ jivhagge ṭhapesi. Tāvadeva satta rasaharaṇisahassāni khobhentaṃ phari. Rājā rasataṇhāya bajjhitvā sahassaṃ tasseva datvā ito paṭṭhāya tava antevāsiṃ mama dhītānañca me bhattaṃ pacāpetvā tvaṃ mayhaṃ āhara so me dhītānaṃ āharatūti āha. Sūdo gantvā tassa ārocesi. So taṃ sutvā idāni me manoratho matthakaṃ patto idānāhaṃ pabhāvatiṃ daṭṭhuṃ labhissāmīti tuṭṭho taṃ sahassaṃ tasseva datvā punadivase bhattaṃ sampādetvā rañño bhattabhājanāni pesetvā rājadhītānaṃ bhattakājaṃ sayaṃ gahetvā pabhāvatiyā vasanapāsādaṃ abhiruhati. Sā taṃ bhattakājaṃ ādāya pāsādaṃ abhiruhantaṃ disvā cintesi ayaṃ attano ananucchavikaṃ dāsakammakarehi kattabbaṃ karoti sace panāhaṃ katipāhaccayena tuṇhī bhavissāmi idāni maṃ esā icchatīti saññī hutvā katthaci agantvā maṃ olokento idheva vasissati idāni maṃ akkositvā paribhāsitvā muhuttaṃpi idha vasituṃ adatvā palāpessāmīti. Sā dvāraṃ aḍḍhavivaṭaṃ katvā ekaṃ hatthaṃ kavāṭe laggetvā ekena alaggaṃ uppīḷetvā dutiyaṃ gāthamāha