Mātā puttena saṃgañchi ubhayo ca jayampatī

samaggā te tadā āsuṃ phītaṃ dharaṇimāvasunti.

Tattha pīṇitāti santappitā. Pāyiṃsūti idāni appamattā bhaveyyāthāti kusanarindena ovaditā agamaṃsu. Agamāsīti katipāhaṃ vasitvā amhākaṃ raṭṭhaṃ gamissāmāti sassuraṃ āpucchitvā gato. Ekarathe yantāti dvepi ekarathaṃ abhiruyha gacchantā. Samānā Vaṇṇarūpenāti vaṇṇena ca rūpena ca samānā hutvā. Nāññamaññamatirocayunti eko ekaṃ nātikkamati. Maṇiratanānubhāvena kira mahāsatto abhirūpo ahosi suvaṇṇavaṇṇo sobhaggappatto. Saṃgañchīti athassa mātā mahāsattassa āgamanaṃ sutvāva nagare bheriṃ cārāpetvā mahāsattassa bahuṃ paṇṇākāraṃ ādāya paccuggamanaṃ katvā samāgañchi. So hi mātarā saddhiññeva nagaraṃ padakkhiṇaṃ katvā sattāhaṃ chaṇakīḷaṃ kīḷitvā alaṅkatapāsādatalaṃ abhiruhi. Te ubhopi jāyapatikā samaggā ahesuṃ. Tato paṭṭhāya yāvajīvaṃ samaggā sammodamānāva phītaṃ dharaṇiṃ ajjhāvasiṃsūti.

Satthā imaṃ dhammadesanaṃ āharitvā saccāni pakāsetvā jātakaṃ samodhānesi. Saccapariyosāne ukkaṇṭhitabhikkhu sotāpattiphale patiṭṭhahi. Tadā mātāpitaro mahārājakulāni ahesuṃ kaniṭṭho ānando khujjā khujjuttarāyeva pabhāvatī rāhulamātā sesaparisā buddhaparisā kusarājā pana ahameva sammāsambuddhoti.