Atīte bārāṇasī brahmavaddhanannāma nagaraṃ ahosi. Tattha manojo nāma rājā rajjaṃ kāresi. Tattha aññataro asītikoṭivibhavo brāhmaṇamahāsālo aputtako ahosi. Tassa brāhmaṇī teneva bhoti puttaṃ patthehīti vutte patthesi. Atha bodhisatto brahmalokā cavitvā tassā kucchismiṃ paṭisandhiṃ gaṇhi. Jātassa cassa soṇakumāroti nāmaṃ kariṃsu. Tassa padasā gamanakāle aññopi satto brahmalokā cavitvā tassāyeva kucchismiṃ paṭisandhiṃ gaṇhi. Tassa nandakumāroti nāmaṃ kariṃsu. Tesaṃ uggahitavedānaṃ sabbasippānaṃ nipphattiṃ pattānaṃ vayappattaṃ rūpasampadaṃ disvā brāhmaṇo brāhmaṇiṃ āmantetvā bhoti puttaṃ soṇakumāraṃ gharabandhanena bandhissāmāti āha. Sā sādhūti sampaṭicchitvā puttassa tamatthaṃ ācikkhi. So alaṃ amma mayhaṃ gharāvāsena Ahaṃ yāvajīvaṃ tumhe paṭijaggitvā tumhākaṃ accayena himavantaṃ pavisitvā pabbajissāmīti āha. Brāhmaṇī brāhmaṇassa tamatthaṃ ārocesi. Te punappunaṃ kathentāpi tassa cittaṃ alabhitvā nandakumāraṃ āmantetvā tāta tenahi tvaṃ kuṭumbaṃ paṭipajjāhīti vatvā nāhaṃ bhātarā chaḍḍitakheḷaṃ sīsena ukkhipāmi ahaṃ pana tumhākaṃ accayena bhātarāva saddhiṃ pabbajissāmīti vutte tesaṃ vacanaṃ sutvā ime dve evaṃ taruṇāva kāme jahanti kimaṅgaṃ pana mayaṃ sabbeyeva pabbajissāmāti cintetvā tātā kiṃ vo amhākaṃ accayena pabbajjāya idāneva sabbeyeva mayaṃ pabbajissāmāti rañño ārocetvā sabbaṃ dhanaṃ dānamukhe visajjetvā dāsajanaṃ bhujissaṃ katvā ñātīnaṃ dātabbayuttakaṃ datvā cattāropi janā brahmavaddhananagarā nikkhamitvā himavantappadese pañcavaṇṇapadumasañchannaṃ saraṃ nissāya ramaṇīye vanasaṇḍe assamaṃ māpetvā pabbajitvā tattha vasiṃsu. Ubhopi mātāpitaro paṭijaggiṃsu. Pātova nesaṃ dantakaṭṭhañca mukhadhovanodakañca datvā paṇṇasālañca pariveṇañca sammajjitvā pānīyaṃ upaṭṭhapetvā araññato madhuraphalāphalāni āharitvā mātāpitaro khādāpenti uṇhena vā sītena vā vārinā nahāpenti jaṭā sodhenti pādaparikammādīni nesaṃ karonti.