Tattha yojentūti hatthārohā hatthī assārohā ca asse kappentu. Rathaṃ sannayha sārathīti samma sārathi tvaṃpi taṃ rathaṃ sannayha. Ābandhanānīti hatthiassarathesu ābandhitabbāni bhaṇḍāni gaṇhatha. Pādesussārayaddhajeti rathe ṭhapitadhajapādesu dhaje ussārayantu ussāpentu. Kosiyoti yasmiṃ assame kosiyagotto vasatīti vadati.

Tamatthaṃ pakāsento satthā āha

tato ca rājā pāyāsi senāya caturaṅginī

agamāsi assamaṃ rammaṃ yattha sammati kosiyoti. Ayaṃ abhisambuddhagāthā.