Tattha tato cāti bhikkhave evaṃ vatvā tato so rājā ekasatakhattiye gahetvā mahatiyā senāya parivuto nandapaṇḍitaṃ purato katvā nagarā nikkhami. Caturaṅginīti caturaṅginiyā senāya agamāsi. Antarāmagge vattamānopi avassaṃ gāmitāya evaṃ vutto. Catuvīsatiakkhobhinisaṅkhena senabalakāyena saddhiṃ maggaṃ paṭipanno tassa nandapaṇḍito iddhānubhāvena aṭṭhusabhavitthataṃ maggaṃ samaṃ māpetvā ākāseyeva cammaṃ pattharitvā tattha pallaṅkena nisīditvā senāya parivuto alaṅkatahatthikkhandhe nisīditvā gacchantena raññā saddhiṃ dhammayuttaṃ kathaṃ kathento sītuṇhādiparissaye vārento agamāsi.

Athassa assamaṃ sampāpuṇadivase soṇapaṇḍito mama kaniṭṭhassa atirekasattamāsādhikāni sattavassāni nikkhamantassāti āvajjetvā kahannu kho so etarahīti dibbena cakkhunā olokento catuvīsatiyā akkhobhiniparivārehi saddhiṃ ekasatarājāno gahetvā maññeva khamāpetuṃ āgacchatīti disvā cintesi imehi rājūhi ceva parisāhi ca mama kaniṭṭhassa bahūni pāṭihāriyāni diṭṭhāni mamānubhāvaṃ ajānitvā ayaṃ kūṭajaṭilo attano pamāṇaṃ na jānāti amhākaṃ ayyena saddhiṃ payojetīti maṃ vambhentā kathentā avīciparāyanā bhaveyyuṃ ahaṃ iddhipāṭihāriyaṃ nesaṃ dassessāmīti. So caturaṅgulamatte aṃsaṃ asaṃphusantaṃ ākāse kājaṃ ṭhapetvā anotattato udakaṃ āharituṃ Rañño avidūre ākāsena pāyāsi. Nandapaṇḍito taṃ āgacchantaṃ disvā attānaṃ dassetuṃ avisahanto nisinnaṭṭhāneyeva antaradhāyitvā palāyitvā himavantaṃ pāvisi. Manojarājā taṃ ramaṇīyena isivesena tathā āgacchantaṃ disvā gāthamāha

kassa kādambayo kājo vehāsaṃ caturaṅgulaṃ

aṃsaṃ asaṃphusaṃ eti udakāhārassa gacchatoti.