Tattha puttaphalanti puttasaṅkhātaṃ phalaṃ. Devatāya namassatīti putto me uppajjatūti devatāya namakāraṃ karoti āyācati. Nakkhattāni ca pucchatīti katarena nakkhattena jāto putto dīghāyuko hoti katarena appāyukoti evaṃ nakkhattāni ca pucchati. Utusaṃvaccharāni cāti channaṃ utūnaṃ katamamhi utumhi jāto dīghāyuko hoti katamamhi utumhi appāyuko hoti kativassāya vā mātu jāto putto dīghāyuko hoti kativassāya appāyuko hotīti evaṃ utusaṃvaccharāni ca pucchati. Utusi nahātāyāti pupphe uppanne utumhi nahātāya. Avakkamoti tiṇṇaṃ sannipātā gabbhāvakkanti hoti kucchiyaṃ gabbho patiṭṭhāti. Tenāti tena gabbhena sā dohaḷinī hoti. Tenāti tadā tassā kucchimhipi nibbattapajāya sineho uppajji tena kāraṇena suhadāti vuccati. Tenāti tena kāraṇena sā janayantīti ca janettīti ca vuccati. Aṅgapāvuraṇena cāti thanantare nipajjāpetvā sarīrasamphassaṃ pharāpentī aṅgasaṅkhāteneva pāvuraṇena. Tosentīti saññāpentī hāsentī. Mammaṃ katvā udikkhatīti aho puttassa me upari vāto paharati ātapo paharatīti evaṃ mammakāraṃ katvā siniddhena hadayena udikkhati. Ubhayampetassāti ubhayaṃpetaṃ dhanaṃ etassa puttassa atthāya aññesaṃ adassetvā sāragabbhādīsu mātā gopeti. Evaṃ putta aduṃ puttāti andhabāla Putta evaṃ rājakulādīsu appamatto hohi aduṃ ca kammaṃ karohīti sikkhāpentī. Iti mātā vihaññatīti kilamati. Pattayobbaneti putte pattayobbane taṃ puttaṃ nissive paradāresu pamattaṃ sāyaṃ anāgacchantaṃ ñatvā assupuṇṇehi nettehi puttaṃ olokentī. Vihaññatīti kilamati. Kicchābhatoti kicchena ābhato paṭijaggito. Micchācaritvānāti mātaraṃ apaṭijaggitvā. Dhanāpīti dhanaṃpi. Ayameva vā pāṭho. Idaṃ vuttaṃ hoti dhanakāmānaṃ uppannaṃ dhanaṃpi mātaraṃ apaṭijaggantānaṃ nassatīti me sutanti. Kicchaṃ vā soti iti dhanaṃ vā tassa nassati dukkhaṃ vā so nigacchati. Labbhametanti etaṃ idha loke ca paraloke ca ānandādisukhaṃ mātaraṃ paricaritvā vijānato paṇḍitassa labbhaṃ sakkā laddhuṃ tādisenāti attho. Dānañcāti mātāpitūnaṃ dānaṃ dātabbaṃ piyavacanaṃ bhaṇitabbaṃ uppannakiccasādhanavasena attho caritabbo. Dhammesūti jeṭṭhāpacāyanadhammesu tattha tattha parisamajjhe vā rahogatānaṃ vā abhivādanādivasena samānattatā kātabbā na raho abhivādanādīni katvā parisati na kātabbāni sabbattha samāneneva bhavitabbaṃ. Ete ca saṅgahā nāssūti sace ete cattāro saṅgahā na bhaveyyuṃ. Samapekkhantīti sammā nayena kāraṇena pekkhanti. Mahattanti seṭṭhattaṃ. Brahmāti puttānaṃ brahmasamā uttamāva seṭṭhā. Pubbācariyāti paṭhamācariyā. Āhuneyyāti āhunaṃ paṭiggāhakā yassa kassaci sakkārassa anucchavikā. Annena athoti athavā pānena ca. Peccāti kālakiriyapariyosāne Ito gantvā sagge pamodati.