Asītinipātavaṇṇanā

cullahaṃsajātakaṃ

sumukhāti idaṃ satthā veḷuvane viharanto āyasmato ānandattherassa jīvitapariccāgaṃ ārabbha kathesi.

Devadattena hi tathāgataṃ jīvitā voropetuṃ payojitesu tesu dhanuggahesu sabbapaṭhamaṃ pesitena āgantvā nāhaṃ bhante sakkomi taṃ bhagavantaṃ jīvitā voropetuṃ mahiddhiko so bhagavā mahānubhāvoti vutte so devadatto āha alaṃ āvuso mā tvaṃ samaṇaṃ gotamaṃ jīvitā voropehi ahameva samaṇaṃ gotamaṃ jīvitā voropessāmīti vatvā tathāgate gijjhakūṭassa pabbatassa pacchimachāyāya caṅkamante sayaṃ gijjhakūṭapabbataṃ abhiruhitvā yantavegena mahatiṃ silaṃ pavijjhi imāya silāya samaṇaṃ gotamaṃ jīvitā voropessāmīti. Tadā dve pabbatakūṭā samāgantvā taṃ khittaselaṃ sampaṭicchiṃsu. Tato pappaṭikāpi patitvā bhagavato pādaṃ paharitvā rudhiraṃ uppādesi. Balavavedanā pavattiṃsu. Jīvako tathāgatassa pādaṃ satthakena phāletvā duṭṭhalohitaṃ mocetvā pūtimaṃsaṃ apanetvā dhovitvā bhesajjaṃ ālimpetvā nīrogamakāsi. Satthā purimasadiso eva mahābhikkhusaṅghaparivuto mahatiyāva buddhalīlāya nagaraṃ pāvisi.