Atha naṃ disvā devadatto cintesi samaṇassa gotamassa rūpasobhaggappattaṃ sarīraṃ disvā koci manussabhūto upasaṅkamituṃ na sakkoti rañño kho pana nālāgiri nāma hatthī atthi so caṇḍo pharuso manussaghāṭako buddhadhammasaṅghaguṇe ajānanto taṃ jīvitakkhayaṃ pāpessatīti. So gantvā tamatthaṃ ārocesi. Rājā sādhūti sampaṭicchitvā hatthācariyaṃ pakkosāpetvā samma sve nālāgiriṃ mattaṃ katvā pātova samaṇena gotamena paṭipannavīthiyaṃ visajjehīti āha. Devadattopi naṃ aññesu divasesu kittakaṃ suraṃ pivatīti pucchitvā aṭṭha ghaṭe bhanteti vutte sve taṃ soḷasa ghaṭe pāyetvā samaṇena gotamena paṭipannavīthiyaṃ abhimukhaṃ kareyyāsīti āha. So sādhūti sampaṭicchi. Rājā nagare bheriñcārāpetvā sve nālāgiriṃ mattaṃ katvā nagare visajjessati nāgarā pātova kattabbakiccāni katvā antaravīthiṃ mā paṭipajjiṃsūti āha. Devadattopi rājanivesanato oruyha hatthisālaṃ gantvā hatthigopake āmantetvā mayaṃ bhaṇe uccaṭṭhānato nīcaṭṭhāne nīcaṭṭhānato uccaṭṭhāne kātuṃ samatthā sace vo yasena attho sve pātova nālāgiriṃ tikhiṇasurāya soḷasa ghaṭe pāyetvā samaṇassa gotamassa āgamanavelāya tuṇḍatomarehi vijjhantā vijjhantā kujjhāpetvā hatthisālaṃ bhindāpetvā samaṇena gotamena paṭipannavīthiyaṃ abhimukhaṃ katvā samaṇaṃ gotamaṃ jīvitakkhayaṃ pāpethāti āha. Te sādhūti sampaṭicchiṃsu. Sā pavutti sakalanagare vitthāritā ahosi. Buddhadhammasaṅghamāmakā Upāsakā taṃ sutvā satthāraṃ upasaṅkamitvā bhante devadatto raññā saddhiṃ ekato hutvā sve tumhehi paṭipannavīthiyaṃ nālāgiriṃ visajjāpessati sve piṇḍāya apavisitvā idheva hotha mayaṃ vihāreyeva buddhappamukhassa bhikkhusaṅghassa bhikkhaṃ dassāmāti vadiṃsu. Satthā sve piṇḍāya na pavisissāmīti avatvāva ahaṃ sve nālāgiriṃ dametvā pāṭihāriyaṃ katvā titthiye madditvā rājagahe piṇḍāya caritvāva bhikkhusaṅghaparivuto nagarā nikkhamitvā veḷuvanameva gamissāmi rājagahavāsino bahūni bhattabhājanāni gahetvā veḷuvanameva āgamissanti sve vihāreyeva bhattaggaṃ bhavissatīti iminā kāraṇena tesaṃ adhivāsesi. Te tathāgatassa adhivāsanaṃ viditvā bhattabhājanāni āharitvā vihāreyeva dānaṃ dassāmāti pakkamiṃsu.