Tasmiṃ khaṇe mahāsatto channavutihaṃsasahassapurakkhato hiyyo otiṇṇaṭṭhāneyeva otaritvā odhiyaṃ nisīditvā sāliṃ khādanto pāyāsi. Nesādo pañjarachiddena olokento tassa rūpasobhaggappattaṃ attabhāvaṃ disvā ayaṃ haṃso sakaṭanābhippamāṇasarīro suvaṇṇavaṇṇo tīhi rattarājīhi gīvāyaṃ parikkhitto tisso rājiyo galena otaritvā udarantarena gatā tisso pacchābhāgena vinivijjhitvā gatā rattakambalasuttasikkāya ṭhapitakāñcanakkhandho viya ativirocati iminā etesaṃ raññāva bhavitabbaṃ imameva gaṇhissāmīti cintesi. Haṃsarājāpi bahuṃ gocaraṃ caritvā jalakīḷaṃ kīḷitvā haṃsagaṇaparivuto cittakūṭameva agamāsi. Iminā niyāmena pañca cha divase gocaraṃ gaṇhi. Sattame divase khemako kāḷaassavālamayaṃ daḷhaṃ mahārajjuṃ vaṭṭetvā yaṭṭhipāsaṃ katvā sveva haṃsarājā imasmiṃ okāse otarissatīti tattato ñatvā antoudake yaṭṭhipāsaṃ oḍḍi. Punadivase haṃsarājā otaranto pādaṃ pāse pavesentoyeva otari. Athassa pāso pādaṃ ayapaṭṭakena kaḍḍhanto viya ābandhitvā gaṇhi. So chindissāmi nanti vegaṃ janetvā ākaḍḍhitvā pātesi. Paṭhamavāre suvaṇṇavaṇṇaṃ cammaṃ chijji. Dutiyavāre kambalavaṇṇaṃ maṃsaṃ chijji. Tatiyavāre nahārū chijjitvā Aṭṭhiṃ āhacca aṭṭhāsi. Catutthavāre pana pādo chijjeyya. Rañño pana hīnaṅgatā nāma ananucchavikāti na vāyāmaṃ akāsi. Balavavedanā pavattiṃsu. So cintesi sacāhaṃ bandharavaṃ ravissāmi ñātakā me cittutrāsā hutvā gocaraṃ agahetvā chātajjhattāva palāyantā samudde patissantīti. So vedanaṃ adhivāsetvā pāsavase pavattitvā sāliṃ khādanto viya hutvā tesaṃ yāvadatthaṃ khāditvā haṃsakīḷaṃ kīḷanakāle mahantena saddena bandharavaṃ ravi. Taṃ sutvā haṃsā maraṇabhayatajjitā vaggavaggā cittakūṭābhimukhā purimanayeneva pakkamiṃsu.
Sumukho haṃsasenāpati kacci nukho idaṃ bhayaṃ mahārājassa uppannaṃ jānissāmi nanti vegena pakkhanditvā purato gacchantassa haṃsagaṇassa antare heṭṭhā vuttanayeneva vicinitvā tīsupi koṭṭhāsesu mahāsattaṃ adissā addhā etassevetaṃ bhayaṃ uppananti nivattitvā āgacchanto mahāsattaṃ pāsena bandhaṃ lohitamakkhitaṃ dukkhāturaṃ paṅkapiṭṭhe nisinnaṃ disvā mā bhāyi mahārāja ahaṃ mama jīvitaṃ pariccajitvā tumhe mocessāmīti vadanto otaritvā mahāsattaṃ assāsento paṅkapiṭṭhe nisīdi. Atha mahāsatto channavutihaṃsasahassesu maṃ chaḍḍetvā palāyantesu ayaṃ sumukho ekakova āgato kinnu kho luddaputtassa āgatakāle maṃ chaḍḍetvā palāyissati udāhu noti vīmaṃsanavasena lohitamakkhito pāsayaṭṭhiyaṃ olambantoyeva tisso gāthā abhāsi