Tattha mahantoti mahanto samāno. Lokassāti haṃsalokassa. Appameyyoti guṇehi pametuṃ asakkuṇeyyo. Mahāgaṇīti mahantena gaṇena samannāgato gaṇasatthā. Ekitthinti yaṃ evarūpo bhavaṃ ekaṃ itthiṃ anusoceyya idaṃ anusocanaṃ na paññavatomiva tenāhaṃ ajjeva taṃ bāloti maññāmīti adhippāyenevamāha. Ādetīti gaṇhāti. Chekapāpakanti sundarāsundaraṃ. Āmakapakkanti āmakañca pakkañca. Loloti rasalolo. Idaṃ vuttaṃ hoti mahārāja yathā nāma vāto padumasarādīni paharitvā sugandhaṃpi saṅkāraṭṭhānādīni paharitvā duggandhaṃpīti ubhayaṃ chekapāpakaṃ gandhaṃ ādiyati yathā ca bālo kumārako ambajambūnaṃ heṭṭhā nisinno hatthaṃ pasāretvā patitaṃ patitaṃ āmakampi pakkampi phalaṃ gahetvā khādati yathā ca rasalolo andho bhatte upanīte yaṃkiñci samakkhikaṃpi nimmakkhikaṃpi Āmisaṃ ādiyati evaṃ itthiyo nāma kilesavasena andhaṃpi duggataṃpi kulinampi akulinampi surūpimpi virūpimpi gaṇhanti bhajanti vātabālaandhasadisānaṃ pāpadhammānaṃ itthīnaṃ kāraṇā vilapasi mahārājāti. Atthesūti kāraṇākāraṇesu. Mandoti andhabālo. Paṭibhāsi manti mama upaṭṭhāsi. Kālapariyāyanti evarūpaṃ maraṇakālaṃ patto imasmiṃ kāle idaṃ kattabbaṃ idaṃ na kattabbaṃ idaṃ vattabbaṃ idaṃ na vattabbanti na jānāsi evāti. Aḍḍhummattoti aḍḍhaummattako maññe hutvā. Udīresīti yathā suraṃ pivitvā nātimatto puriso yaṃ vā taṃ vā vilapati evaṃ vilapasīti attho. Seyyāti varā uttamā. Māyā cāti ādīsuyeva itthiyo nāma vañcanaṭṭhena māyā agayhūpagaṭṭhena marīcīva sokādīnaṃ paccayattā sokā rogā anekappakārā upaddavā kodhādīhi atithaddhabhāveneva kharā. Tā hi nissāya andubandhanādīhi bajjhanato bandhanā cetā itthiyo nāma sarīraguhāya pana vasanakamaccu nāma etādevāti kāmahetu kāmanidānaṃ kāmādhikaraṇameva rājāno coraṃ gahetvā tikhiṇapharasunā sīsaṃ chinditvā sūle ropentīti dīpetabbo.

Tato dhataraṭṭho mātugāme paṭibaddhacittatāya tvaṃ mātugāmassa guṇaṃ na jānāsi paṇḍitā eva jānanti nahetā garahitabbāti dīpento gāthamāha