tathā hi vaṇṇo pattānaṃ phalaṃ veḷuṃva taṃ vadhi.
Muttosi necchasi uḍḍetuṃ sayaṃ bandhaṃ upāgami
sosajja saṃsayappatto atthaṃ gaṇhāhi mā mukhanti.
Tattha yanti yaṃ mātugāmasaṅkhātaṃ vatthuṃ paññāvuḍḍhehi paññattaṃ tesameva pākaṭaṃ na bālānaṃ. Mahābhūtāti mahāguṇā mahānisaṃsā. Upapajjisunti paṭhamakappakāle itthīliṅgassa paṭhamaṃ pātubhūtattā paṭhamaṃ nibbattāti attho. Tāsūti sumukha tāsu itthīsu kāyavacīkhiḍḍā ca paṇihitā ohitā ṭhapitā kāmaguṇarati ca patiṭṭhitā. Vījānīti buddhapaccekabuddhaariyasāvakacakkavattiādivījāni tāsu ruhanti. Yadidanti ye ete sabbepi sattā. Pajāyareti sabbe tāsaññeva kucchimhi saṃvaḍḍhāti dīpeti. Nibbijeti nibbindeyya. Pāṇamāsajja pāṇibhīti Attano pāṇehi tāsaṃ pāṇaṃ assādetvā attano jīvitaṃ cajantopi tā labhitvā ko nibbindeyyāti attho. Nāññoti na añño sumukha mayā cittakūṭatale haṃsagaṇamajjhe nisinnena taṃ adisvā kahaṃ sumukhoti vutte esa mātugāmaṃ gahetvā kāñcanaguhāyaṃ uttamaratiṃ anubhotīti vadanti evaṃ tvameva itthīnaṃ atthesu yuñjasi yuttappayuttova ahosi na aññoti attho. Tassa tyajjāti tassa te ajja maraṇabhaye jāte iminā maraṇabhayena bhīto maññe ayaṃ mātugāmassa dosadassanā nipuṇā mati jāyateti adhippāyenevamāha. Sabbo hīti yo hi koci. Saṃsayappattoti jīvitasaṃsayappatto. Bhīrūti bhīru hutvāpi bhayaṃ adhivāseti. Mahantānoti ye pana paṇḍitā ca honti mahante ca ṭhāne ṭhitāti mahantāno. Atthe yuñjanti duyyujeti te duyyujjepi atthe yuñjanti ghaṭenti vāyamanti tasmā mā bhāyi dhīro hohīti taṃ ussāhanto evamāha. Āpadanti sāmino āgataṃ āpadaṃ esa sūro paṭibāhati etadatthāya sūraṃ mantinaṃ icchanti. Attapariyāyanti attano parittāṇaṃpica kātuṃ sakkotīti adhippāyo. Vikantiṃsūti chindiṃsu. Idaṃ vuttaṃ hoti samma sumukha tvaṃ mayā attano anantare ṭhāne ṭhapito tasmā yathā ajja rañño sūdā amhe maṃsatthāya mā vikantiṃsu tathā karohīti. Tādiso hi amhākaṃ pattavaṇṇo. Taṃ vadhīti svāyaṃ vaṇṇo yathā nāma veḷuṃ nissāya jātaṃ phalaṃ veḷumeva vadhati tathā taṃ vadhi tañca mañca mā vadhīti adhippāyenevamāha. Muttosīti Yathāsukhaṃ cittakūṭapabbataṃ gacchāti evaṃ luddaputtena mayā saddhiṃ mutto visajjito samānopi uḍḍetuṃ na icchasi. Sayanti rājānaṃ daṭṭhukāmo hutvā sayameva vadhaṃ upagatosi evamidaṃ amhākaṃ bhayaṃ taṃ nissāya āgataṃ. Sosajjāti sosi ajja jīvitasaṃsayappatto. Atthaṃ gaṇhāhi mā mukhanti idāni amhākaṃ muñcanakāraṇaṃ gaṇha yathā muñcāma tathā vāyāma vātova gandhamādetīti ādīni vadanto itthīgarahatthāya mukhaṃ mā pasārayīti.