Tattha puññasaṅkāseti attano puññasadise. Lakkhaṇasammateti seṭṭhasammate abhiññāte. Khalūti nipāto. Tassa te khalu disvāti purimapadena sambandho. Dethāti ādīni rājā pasannākāraṃ karonto āha. Tattha kāmaṅkaro hiraññassāti hiraññaṃ assa kāmakiriyā atthu. Yāvantanti yattakaṃ esa gacchati tattakaṃ hiraññamassa dethāti attho.

Evaṃ pasannākāraṃ kāretvā pītisomanassasamussāhito gacchatha naṃ alaṅkaritvā ānethāti āha. Atha naṃ amaccā rājanivesanā otāretvā kappitakesamassuṃ nahātānulittaṃ sabbālaṅkārapaṭimaṇḍitaṃ katvā rañño dassesuṃ. Athassa rājā ekasaṃvacchare satasahassuṭṭhānake dvādasagāmake ājaññayuttaṃ rathaṃ alaṅkatamahāgehaṃ dethāti mahantaṃ yasaṃ dāpesi. So mahantaṃ yasaṃ labhitvā attano kammaṃ pakāsetuṃ ārabhi na te deva mayā yo vā so vā haṃso ānīto ayaṃ pana channavutihaṃsasahassānaṃ rājā dhataraṭṭho nāma ayaṃ senāpati sumukho nāmāti āha. Atha naṃ rājā kathaṃ te samma ete gahitāti pucchi.

Tamatthaṃ pakāsento satthā āha

Disvā luddaṃ pasannattaṃ kāsirājetadabravi