Tattha tanti tvaṃ. Khemanti evaṃnāmakaṃ pokkharaṇiṃ. Ghuṭṭhanti catūsu kaṇṇesu ṭhatvā ghosāpitaṃ. Dasadhāti imā tā dasavidhā Disā taṃ disāsu tayā abhayaṃ ghuṭṭhaṃ. Oggayhāti oggāhetvā āgatānaṃ santikā. Pahūtaṃ khādananti pahūtañca padumuppalasāliādikaṃ khādanaṃ. Idaṃ sutvāti tesaṃ tava pokkharaṇiṃ oggāhetvā āgatānaṃ santikā idaṃ abhayaṃ sutvā. Tavantiketi tava samīpe tayā kāritaṃ pokkharaṇiṃ āgatamhāti attho. Te teti te mayaṃ tava pāsena bandhā. Purakkhatvāti purato katvā. Icchālobhanti icchāsaṅkhātaṃ pāpakaṃ lobhaṃ. Ubhosandhinti ubhayaṃ devaloke ca manussaloke ca paṭisandhiṃ ime pāpadhamme purato katvā caranto puggalo sugatiṃ paṭisandhiṃ atikkamitvā. Asātanti nirayaṃ upapajjati.

Evaṃ parisamajjheyeva rājānaṃ lajjāpesi. Atha naṃ rājā nāhaṃ sumukha tumhe māretvā maṃsaṃ khāditukāmo gaṇhāpesiṃ paṇḍitabhāvaṃ pana vo sutvā subhāsitaṃ sotukāmova gaṇhāpesinti pakāsento āha

nāparajjhāma sumukha napi lobhāya maggahiṃ

sutā ca paṇḍitātyattha nipuṇā catthacintakā.