So kuddho pharusaṃ vācaṃ nicchāresi ayoniso

yānasmāsu na vijjanti nayidaṃ paññavatāmivāti.

Tattha disvāti taṃ bahuṃ aggapānabhojanaṃ disvā. Pesitanti āharāpetvā upanītaṃ. Khattadhammānanti paṭhamakārakesu paṭisanthāradhammānaṃ. Tato pucchi anantarāti tasmiṃ kāle. Kacci nu bhototi anupaṭipāṭiyā pucchitā pana cha gāthā heṭṭhā vuttatthāyeva. Anuppīḷanti kacci raṭṭhavāsino yantena ucchuṃ viya anuppīḷesīti pucchi. Akutociupaddavanti kutoci anupaddavaṃ. Samena anusāsasīti kacci tvaṃ idaṃ raṭṭhaṃ dhammena samena anusāseyyāsi. Santoti sīlādiguṇayuttā sappurisā. Niraṅkatvāti chaḍḍetvā. Anāgataṃ dīghanti anāgataṃ attano jīvitaṃ pavattitaṃ kacci dīghaṃ. Samavekkhasīti āyusaṅkhārānaṃ parittabhāvaṃ jānāsīti pucchati. Madanīyeti madāvahe rūpādiārammaṇe. Na santasīti na bhāyasi. Idaṃ vuttaṃ hoti kacci rūpādīsu kāmaguṇesu appamatto hutvā dānādīnaṃ kusalānaṃ katattā paralokaṃ na bhāyasīti. Dasasūti dasasu rājadhammesu. Dānādīsu pavattitacetanā dānaṃ pañcasīladasasīlādīni sīlaṃ deyyadhammacāgo pariccāgo ujubhāvo ājjavaṃ mudubhāvo maddavaṃ uposathakammaṃ tapo mettāpubbabhāgo akkodho karuṇāpubbabhāgo avihiṃsā adhivāsanaṃ khanti avirodho avirodhanaṃ. Acintetvāti mama imaṃ guṇasampattiṃ acintetvā. Bhāvadosanti cittadosaṃ. Anaññāyāti ajānitvā. Asmākanti amhākaṃ cittadoso nāma natthi yamesa jāneyya taṃ ajānitvāva pharusaṃ kakkhalaṃ visajjesi. Ayonisoti anupāyena. Yānasmāsūti yāni vajjāni amhesu na santi tāni vadati. Nayidanti na idaṃ. Tasmā mama idaṃ vacanaṃ paññavatāmiva na hoti tenesa mama na paṇḍito viya upaṭṭhāti.

Taṃ sutvā sumukho mahāguṇasampannova rājā apasādito so me kuddho khamāpessāmi nanti cintetvā āha