Tasmiṃ khaṇe ummādantī sabbālaṅkārapaṭimaṇḍitā tesaṃ santikaṃ agamāsi. Te taṃ disvā satiṃ paccupaṭṭhapetuṃ asakkontā kilesamadamattā hutvā attano vippakatabhojanabhāvaṃ na jāniṃsu. Ekacce ālopaṃ gahetvā bhuñjāmāti saññāya sīse ṭhapesuṃ. Ekacce upakacchantare khipiṃsu ekacce bhittiṃ pahariṃsu. Sabbepi ummattakā ahesuṃ. Sā te disvā ime kira mama lakkhaṇaṃ vīmaṃsissanti gīvāyaṃ ne gahetvā nīharāthāti te nīharāpesi. Te maṅkubhūtā rājanivesanaṃ gantvā ummādantiyā kuddhā deva sā itthī kāḷakaṇṇī na tumhākaṃ anucchavikāti vadiṃsu. Rājā kāḷakaṇṇī kirāti na taṃ ānāpesi. Sā taṃ pavuttiṃ sutvā ahaṃ kira kāḷakaṇṇīti raññā na gahitā kāḷakaṇṇiyo nāma evarūpā na hontīti vatvā hotu sace pana taṃ rājānaṃ passissāmi jānissāmīti tasmiṃ āghāṭaṃ bandhi. Atha naṃ pitā abhipārakassa adāsi. Sā tassa piyā ahosi manāpā. Kassa pana kammassa nissandena Sā evarūpā ahosiṃti. Rattavatthadānassa nissandena.
Sā kira atīte bārāṇasiyaṃ daliddakule nibbattitvā ussavadivase puññasampannā itthiyo kusumbharattavatthaṃ nivāsetvā alaṅkatā kīḷantiyo disvā tādisaṃ vatthaṃ nivāsetvā kīḷitukāmā hutvā mātāpitūnaṃ ārocetvā tehi amma mayaṃ daliddā kuto no evarūpaṃ vatthanti vutte tenahi maṃ ekasmiṃ aḍḍhakule bhatiṃ kātuṃ anujānātha te mama guṇaṃ ñatvā dassantīti vatvā tehi anuññātā ekaṃ kulaṃ upasaṅkamitvā kusumbharattavatthena bhatiṃ karomīti āha. Atha naṃ te tīṇi saṃvaccharāni kamme kate tava guṇaṃ ñatvā dassāmāti vadiṃsu. Sā sādhūti paṭissuṇitvā kammaṃ paṭipajji. Te tassā guṇaṃ ñatvā aparipuṇṇesuyeva tīsu saṃvaccharesu tassā ghanakusumbharattavatthena saddhiṃ aññaṃpi vatthaṃ datvā tava sahāyikāhi saddhiṃ gantvā nahātvā nivāsehīti taṃ pesayiṃsu. Sā sahāyikāhi ādāya gantvā rattavatthaṃ tīre ṭhapetvā nahāyi. Tasmiṃ khaṇe eko kassapadasabalassa sāvako acchinnacīvaro sākhābhaṅgaṃ nivāsetvā ca pārupitvā ca taṃ padesaṃ pāpuṇi. Sā taṃ disvā ayaṃ bhaddanto acchinnacīvaro bhavissati pubbepi adinnabhāvena mama nivāsanaṃ dullabhaṃ jātanti taṃ vatthaṃ dvidhā phāletvā ekaṃ koṭṭhāsaṃ ayyassa dassāmīti cintetvā uttaritvā attano nivāsanaṃ nivāsetvā tiṭṭhatha bhanteti vatvā gantvā theraṃ vanditvā vatthaṃ majjhe phāletvā tassevekaṃ koṭṭhāsaṃ adāsi. So ekamante Paṭicchanne ṭhatvā sākhābhaṅgaṃ chaḍḍetvā tassevekaṃ kaṇṇaṃ nivāsetvā ekaṃ pārupitvā nikkhami. Athassa vatthobhāsena sakalasarīraṃ taruṇasuriyo viya ekobhāsaṃ ahosi. Sā taṃ disvā mayhaṃ ayyo paṭhamaṃ na sobhati idāni taruṇasuriyo viya virocati idampi etasseva dassāmīti dutiyampi koṭṭhāsaṃ datvā bhante ahaṃ bhave vicarantī uttamarūpadharā bhaveyyaṃ maṃ disvā koci puriso sakabhāvena saṇṭhāretuṃ nāsakkhi mayā abhirūpatarā nāma aññā mā hotūti patthanaṃ paṭṭhapesi. Theropi anumodanaṃ katvā pakkāmi. Sā devaloke saṃsarantī tasmiṃ kāle ariṭṭhapure nibbattetvā tathā abhirūpā ahosi.