Tasmiṃ samaye bhagavā sāvatthiyaṃ viharanto paccūsasamayeva lokaṃ volokento ime evaṃ yuddhasajje nikkhante addasa disvāna mayi gate esa kalaho vūpasamissati nukho noti upadhārento ahamettha gantvā kalahaṃ vūpasamanatthaṃ tīṇi jātakāni kathessāmi Tato kalaho vūpasamissati atha sāmaggidīpanatthāya dve jātakāni kathetvā attadaṇḍasuttaṃ kathessāmi desanaṃ me sutvā ubhayanagaravāsino aḍḍhateyyāni aḍḍhateyyāni rājakumārasatāni dassanti ahaṃ te pabbājessāmi mahanto samāgamo bhavissatīti sanniṭṭhānaṃ katvā pātova sarīrapaṭijagganaṃ katvā sāvatthiyaṃ piṇḍāya caritvā piṇḍapātapaṭikkanto sāyaṇhasamaye gandhakuṭito nikkhamitvā kassaci anārocetvā sayameva pattacīvaramādāya dvinnaṃ senānaṃ antare ākāse pallaṅkaṃ ābhujitvā tesaṃ saṃvegajananatthaṃ divā andhakāraṃ kātuṃ kesato raṃsiyo visajjento nisīdi. Atha nesaṃ saṃviggamānasānaṃ attānaṃ dassento chabbaṇṇā buddharaṃsiyo visajjesi. Kapilavatthuvāsinopi bhagavantaṃ disvā amhākaṃ ñātiseṭṭho āgato diṭṭho nukho tena amhākaṃ kalahakaraṇabhāvoti cintetvā na kho pana sakkā satthari āgate amhehi parassa sarīre satthaṃ pātetuṃ koliyanagaravāsino amhe hanantu vā pacantu vāti āvudhāni chaḍḍesuṃ. Koliyanagaravāsinopi tatheva akaṃsu. Atha bhagavā otaritvā ramaṇīye padese vālukāpuline paññattapavarabuddhāsane nisīdi anopamāya buddhasiriyā virocamāno. Tepi rājāno bhagavantaṃ vanditvā nisīdiṃsu.
Atha ne satthā jānantopi kasmā idhāgamittha mahārājāti pucchi. Neva bhante nadīdassanatthāya na kīḷanatthāya na araññe ramaṇīyabhāvadassanatthāya apica kho imasmiṃ pana ṭhāne saṅgāmaṃ paccupaṭṭhapetvā āgatamhāti. Kiṃ nissāya vo kalaho mahārājāti. Udakaṃ nissāya bhanteti. Udakaṃ kiṃ agghati mahārājāti. Appagghaṃ bhanteti. Paṭhavī nāma kiṃ agghati mahārājāti. Anagghā bhanteti. Khattiyā kiṃ agghanti mahārājāti. Khattiyā nāma anagghāva bhanteti. Appagghaṃ udakaṃ nissāya kasmā anagghe khattiye nāsetha mahārājāti kalahasmiṃ hi assādo nāma natthi kalahavasena hi mahārājā ekāya rukkhadevatāya kāḷasīhena saddhiṃ bandhāghāṭo sakalaṃpi imaṃ kappaṃ anuppattoyevāti vatvā phandanajātakaṃ kathesi. Tato parapattiyena nāma mahārājā na bhavitabbaṃ parapattiyā hutvā hi ekassa sasakassa kathāya tiyojanasahassavitthate himavante catuppadagaṇā mahāsamuddaṃ pakkhandiṃsu tasmā parapattiyena na bhavitabbanti vatvā duddabhajātakaṃ kathesi. Tato kadāci mahārājā dubbalopi mahābalassa randhaṃ passati kadāci mahabbalopi dubbalassa randhaṃ passati laṭukikāpi hi sakuṇikā hatthināgaṃ ghāṭesīti vatvā laṭukikajātakaṃ kathesi. Evaṃ kalahavūpasamanatthāya tīṇi jātakāni kathetvā tathā sāmaggiparidīpanatthāya dve jātakāni kathesi. Samaggānañhi mahārājā koci otāraṃ nāma passituṃ na sakkotīti vatvā rukkhadhammajātakaṃ kathesi. Tathā samaggānaṃ mahārājā koci vivaraṃ passituṃ nāsakkhi yadā pana aññamaññaṃ vivādamakaṃsu atha ne eko nesādaputto jīvitakkhayaṃ pāpetvā ādāya gato vivāde assādo nāma natthīti vatvā vaṭṭakajātakaṃ kathesi. Evaṃ imāni pañca jātakāni kathetvā avasāne attadaṇḍasuttaṃ kathesi.