Dutiyavatthusmiṃ atītakathā catukkanipāte kākavantījātakavaṇṇanāya vitthāritā. Tadā pana kuṇālo garuḷo ahosi. Tasmā attano diṭṭhakāraṇaṃ pakāsento diṭṭhā mayāti ādimāha.
Tatiyavatthusmiṃ atīte brahmadatto kosalarājānaṃ vadhitvā rajjaṃ gahetvā tassa aggamahesiṃ gabbhiniṃ ādāya bārāṇasiṃ paccāgantvā tassā gabbhinibhāvaṃ jānantopi aggamahesiṃ akāsi. Sā paripakkagabbhā suvaṇṇarūpakasadisaṃ puttaṃ vijāyitvā vuḍḍhippattaṃpi naṃ bārāṇasirājā Esa me paccāmittassa putto kiṃ imināti mārāpessati mā me putto parahatthe maratūti cintetvā dhātiṃ āha amma idaṃ dārakaṃ pilotikāya attharitvā āmakasusāne nipajjāpetvā ehīti. Dhātī tathā katvā nahātvā paccāgami. Kosalarājāpi maritvā puttassa ārakkhadevatā hutvā nibbatti. Tassānubhāvena ekassa eḷakapālakassa tasmiṃ padese eḷikā cārentassa ekā eḷikā taṃ kumāraṃ disvā sinehaṃ uppādetvā khīraṃ pāyetvā thokaṃ vicaritvā puna āgantvā tayo cattāro vāre pāyesi. Eḷakapālako tassā kiriyaṃ disvā taṃ ṭhānaṃ gantvā taṃ dārakaṃ disvā puttasinehaṃ paccupaṭṭhapetvā netvā attano bhariyāya adāsi. Sā pana aputtakā ahosi. Tenassā thaññaṃ natthi. Atha naṃ eḷikāya khīrameva pāyesi. Tato paṭṭhāya pana devasikaṃ devasikaṃ dve tisso eḷikā maranti. Eḷakapālako imasmiṃ paṭijaggiyamāne sabbā eḷikā marissanti kiṃ no imināti taṃ ekasmiṃ mattikabhājane nipajjāpetvā aparena pidahitvā māsacuṇṇena mukhaṃ nibbivaraṃ limpitvā nadiyaṃ visajjāpesi. Tamenaṃ vuyhamānaṃ heṭṭhā titthe rājanivesane jiṇṇapaṭisaṅkhārako eko caṇḍālo sapajāpatiko makaciṃ dhovanto taṃ disvā vegena gantvā udakā āharitvā tīre ṭhapetvā kimetthāti vivaritvā olokento abhirūpaṃ dārakaṃ passi. Bhariyāpissa aputtakā. Tassā tasmiṃ puttasineho nibbatti. Atha naṃ gehaṃ netvā paṭijaggi. Taṃ sattaṭṭhavassakālato paṭṭhāya Mātāpitaro rājakulaṃ gacchantā ādāya gacchanti. Soḷasavassakālato paṭṭhāya rājakulaṃ gantvā jiṇṇapaṭisaṅkharaṇaṃ karoti. Rañño aggamahesiyā ca kuruṅgadevī nāma dhītā ahosi uttamarūpadharā. Sā tassa diṭṭhakālato paṭṭhāya tasmiṃ paṭibaddhacittā hutvā aññattha anabhiratā tasseva kammakaraṇaṭṭhānameva āgacchati. Tesaṃ abhiṇhadassaneneva aññamaññaṃ paṭibaddhacittānaṃ antorājakuleyeva paṭicchannokāse ajjhācāro pavattati. Gacchante kāle paricārikāyo ñatvā rañño ārocesuṃ.