Rājā kujjhitvā amacce sannipātetvā iminā caṇḍālaputtena idaṃ nāma kataṃ imassa kattabbaṃ jānāthāti āha. Amaccā mahāparādho esa nānāvidhāni kammakaraṇāni kāretvā pacchā naṃ māretuṃ vaṭṭatīti vadiṃsu. Tasmiṃ khaṇe kumārassa pitā ārakkhadevatā tasseva kumārassa mātu sarīre adhimucci. Sā devatānubhāvena rājānaṃ upasaṅkamitvā mahārāja nāyaṃ kumāro caṇḍālo esa mama kucchismiṃ nibbatto kosalarañño putto ahaṃ deva me putto matoti tumhākaṃ musāvādaṃ avacaṃ ahamevetaṃ tumhākaṃ paccāmittassa puttoti dhātiyā datvā āmakasusāne chaḍḍāpesiṃ atha naṃ eko eḷakapālako paṭijaggi so attano eḷikāsu marantīsu nadiyā pavāhesi atha naṃ vuyhamānaṃ tumhākaṃ gehe jiṇṇapaṭisaṅkhārako caṇḍālo disvā taṃ posesi sace na saddahatha te sabbe pakkosāpetvā pucchathāti. Rājā dhātiṃ ādiṃ katvā Te sabbe pakkosāpetvā pucchi. Te tatheva taṃ pavuttiṃ rañño ārocesuṃ. Taṃ pavuttiṃ sutvā rājā jātisampanno kumāroti tuṭṭho taṃ nahāpetvā alaṅkārāpetvā tasseva dhītaraṃ adāsi. Tassa pana eḷikānaṃ māritattā eḷakakumāroti nāmaṃ kariṃsu. Athassa rājā senābāhanaṃ datvā gaccha attano pitusantakaṃ rajjaṃ gaṇhāti taṃ uyyojesi. So kuruṅgadeviṃ ādāya gantvā rajje patiṭṭhāsi. Athassa bārāṇasirājā anuggahitasippo ayanti sippaṃ sikkhāpanatthaṃ chaḷaṅgakumāraṃ nāmācariyaṃ katvā pesesi. So tassa ācariyo meti senāpatiṭṭhānaṃ adāsi. Aparabhāge kuruṅgadevī tena saddhiṃ anācāramakāsi. Senāpatinopi paricārako dhanantevāsī nāma atthi. So tassa hatthe kuruṅgadeviyā vatthālaṅkārādīni pesesi. Sā tenāpi saddhiṃ pāpamakāsi.

Kuṇālo taṃ kāraṇaṃ āharitvā dassento diṭṭhā mayāti ādimāha. Tattha lomasundarīti lomarājiyā maṇḍitaudarā. Chaḷaṅgakumāradhanantevāsināti eḷakakumāraṃ patthayamānāpi chaḷaṅgakumārasenāpatinā ca tasseva paricārakena dhanantevāsinā ca saddhiṃ pāpamakāsi. Evaṃanācārā itthiyo dussīlā pāpadhammā tenāhaṃ tā nappasaṃsāmīti. Idaṃ mahāsatto atītaṃ āharitvā dassesi. So hi tadā chaḷaṅgakumāro ahosi. Tasmā attanā diṭṭhakāraṇaṃ āhari.