Tattha veṇikatāti kataveṇiyo. Yathā hi moliṃ bandhitvā aṭaviyaṃ ṭhitacorā dhanaṃ vilumpanti evametāpi kilesavasaṃ netvā dhanaṃ vilumpanti. Madirā viya visaduṭṭhāti visamissakā surā viya. Yathā sā vikāraṃ dasseti evametāpi aññesu purisesu sā rattā kiccākiccaṃ ajānantiyo aññasmiṃ kattabbe aññameva karontiyo vikāraṃ dassenti. Vācāsandhitiyoti yathā vāṇijo attano bhaṇḍassa vaṇṇameva bhaṇati evametāpi attano aguṇaṃ paṭicchādetvā Guṇameva pakāsenti. Viparivattāyoti yathā issamigassa siṅgaṃ parivattetvā ṭhitaṃ evaṃ lahucittatāya viparivattāyo honti. Uragamivāti urago viya musāvāditāya dujjivhā nāma. Sobbhamivāti yathā padarapaṭicchanno gūthakūpo evaṃ vatthālaṅkārapaṭicchannā hutvā vicaranti. Yathā vā kacavarādipaṭicchanno āvāto akkanto pādadukkhaṃ janeti evameva tāpi vissāsena upaseviyamānā dukkhaṃ janenti. Pātālamivāti yathā mahāsamudde pātālaṃ duppūraṃ evametāpi methunena vijāyanena alaṅkatenāti tīhi duppūrā. Tenevāha tiṇṇaṃ bhikkhave dhammānaṃ atitto mātugāmo kālaṃ karoti methunadhammena vijāyanena alaṅkārenāti ādi. Rakkhasī viyāti yathā rakkhasī nāma maṃsagiddhatāya dhanena na sakkā tosetuṃ bahuṃpi dhanaṃ paṭikkhipitvā maṃsameva pattheti evametāpi methunagiddhatāya bahunāpi dhanena na tussanti dhanaṃ agahetvā methunameva patthenti. Yamovāti yathā yamo ekantaharo na kañci pariharati evametāpi jātisampannādīsu na kañci pariharanti sabbaṃ kilesavasena sīlavināsaṃ pāpetvā dutiyacittavāre nirayaṃ upanenti. Sikhīrivāti yathā sikhī suciṃpi asuciṃpi sabbaṃ bhakkhayati tatheva tāpi hīnuttame sabbe sevanti. Nadīupamāyapi eseva nayo. Yena kāmaṃcarāti bhummatthe karaṇavacanaṃ. Yattha etāsaṃ kāmo hoti tattheva dhāvanti. Nerūti himavati eko suvaṇṇapabbato taṃ upagatā kākāpi suvaṇṇavaṇṇāva honti. Yathāpi so evametāpi nibbisesakarā attānaṃ upagataṃ ekasadisaṃ katvā passanti. Visarukkhoti ambasadiso Kimpakkarukkho so niccameva phalati vaṇṇādisampanno ca hoti tena taṃ nirāsaṅkā paribhuñjitvā maranti. Evametāpi rūpādivasena niccaphalitāya ramaṇīyā viya khāyanti. Seviyamānā pana pamādaṃ uppādetvā apāyesu pātenti.