tathāhi mayhaṃ avalokayantī

ummattakaṃ ummādantī akāsīti.

Tattha matyā ca petyā cāti mātarā ca pitarā ca. Mayhanti upayogatthe sampadānaṃ. Avalokayantīti mayā avalokitā sayaṃpi maṃ avalokentī maṃ ummattakaṃ akāsīti attho.

Sāpissa kampitabhāvaṃ ñatvā vātapānaṃ thaketvā sirigabbhameva agamāsi. Raññopi tassā diṭṭhakālato paṭṭhāya nagarapadakkhiṇakaraṇe cittameva nāhosi. So sārathiṃ āmantetvā samma sunanda rathaṃ nivattehi ayaṃ chaṇo amhākaṃ nānucchaviko abhipārakasenāpatissānucchaviko rajjaṃpi tassevānucchavikanti rathaṃ nivattāpetvā pāsādaṃ abhiruyha sirisayane nipajjitvā vippalapanto āha