So sādhūti sampaṭicchi rattiṃ bhuttasāyamāso tāya saddhiṃ nipajjitvā pariggaṇhissāmi nanti pakatiyā niddopagamanavelāya Niddūpagato viya ahosi. Sāpi vuṭṭhāya tatheva akāsi. Rājā tassā anupadaññeva gantvā jambūchāyaṃ nissāya aṭṭhāsi. Pīṭhasappi deviyā kujjhitvā tvaṃ kasmā ajja aticirāyantī āgatāsīti hatthena kaṇṇasaṅkhaliṃ pahari. Atha naṃ mā maṃ kujjhittha sāmi ahaṃ rañño niddokkamanaṃ olokesinti vatvā tassa gehe pādaparicārikā viya ahosi. Tena panassa pahārena sīhamukhakuṇḍalaṃ kaṇṇato galitvā rañño pādamūle pati. Rājā vaṭṭissati etanti taṃ gahetvā gato. Sāpi teneva saddhiṃ aticāraṃ caritvā purimaniyāmenevāgantvā raññā saddhiṃ nipajjituṃ ārabhi. Rājā paṭikkhipitvā punadivase kinnarī devī mayā dinnaṃ sabbālaṅkāraṃ alaṅkaritvā etūti sāsanaṃ pesesi. Sā sīhamukhakuṇḍalaṃ mayā suvaṇṇakārassa santike pahitanti vatvā nāgami. Puna pesite sā ekakuṇḍalāva agamāsi. Rājā kahante kuṇḍalanti pucchi. Suvaṇṇakārassa santiketi. Suvaṇṇakāraṃ pakkosāpetvā kiṃkāraṇā imissā kuṇḍalaṃ na desīti āha. Nāhaṃ gaṇhāmi devāti. Rājā kujjhitvā he pāpacaṇḍāle mādisena te suvaṇṇakārena bhavitabbanti vatvā taṃ kuṇḍalaṃ tassā purato khipitvā purohitaṃ āha samma saccaṃ tayā vuttaṃ gaccha sīsamassā chedāpehīti. So taṃ rājageheyeva ekasmiṃ ṭhāne ṭhapetvā rājānaṃ upasaṅkamitvā deva mā kinnarīdeviyā kujjha sabbā itthiyo evarūpāyeva sace na saddahi sace itthīnaṃ dussīlabhāvaṃ ñātukāmosi dassessāmi Te etāsaṃ pāpakammañceva bahumāyābhāvañca ehi aññātakavesena janapadaṃ carāmāti. Rājā sādhūti mātaraṃ rajjaṃ paṭicchāpetvā tena saddhiṃ cārikaṃ pakkāmi. Tesaṃ yojanamaggaṃ gantvā mahāmagge nisinnānaṃ eko kuṭumbiko puttassatthāya maṅgalaṃ katvā ekaṃ kumārikaṃ paṭicchannayāne nisīdāpetvā purato mahantena parivārena āgacchati. Taṃ disvā purohito rājānamāha sace icchasi imaṃ kumārikaṃ tayā saddhiṃ pāpaṃ kāretuṃ sakkomi devāti. Kiṃ kathesi mahāparivārā esā na sakkā sammāti. Purohito tenahi passa devāti purato gantvā maggato avidūre sāṇiṃ parikkhipitvā rājānaṃ antosāṇiyaṃ katvā sayaṃ maggapasse rodanto nisīdi. Atha naṃ so kuṭumbiko disvā tāta kasmā rodasīti pucchi. Bhariyā me sāmi garugabbhā taṃ kulagharaṃ netuṃ maggaṃ paṭipannosmi tassā antarāmaggeyeva gabbho cali esā antosāṇiyaṃ kilamati kācipissā itthī santike natthi mayāpi tattha gantuṃ na sakkā na jānāmi kiṃ bhavissatīti ekaṃ itthiṃ laddhuṃ vaṭṭatīti. Yadi evaṃ mā rodi amhākaṃ āgacchamānā bahū itthiyo ekāpi gamissatīti. Tenahi ayameva kumārikā gacchatu etissā maṅgalaṃ bhavissatīti. So cintesi saccaṃ vadasi. Suṇisāyapi me maṅgalameva iminā hi nimittena sā puttadhītāhi vaḍḍhissatīti tameva pesesi. Sā tattha pavisitvā rājānaṃ disvāva paṭibaddhacittā hutvā pāpamakāsi. Rājāpissā Aṅgulimuddikaṃ adāsi. Atha naṃ katakiccaṃ nikkhamitvā āgataṃ pucchiṃsu kiṃ vijātāti. Suvaṇṇavaṇṇaṃ puttanti. Kuṭumbiko taṃ ādāya gacchati. Purohitopi rañño santikaṃ gantvā diṭṭhā te deva kumārikā evaṃpāpā kimaṅgaṃ pana aññāpi apica pana te kiñci dinnanti. Āma aṅgulimuddikā me dinnāti. Kasmā te dinnā nassā taṃ dassāmīti vegena gantvā yānakaṃ gaṇhitvā kimetanti vutte ayaṃ hi me brāhmaṇiyā ussīsake ṭhapitaṃ muddikaṃ gahetvā āgatā dehi amma muddikanti. Sā taṃ dadamānā brāhmaṇahatthaṃ nakhena vijjhitvā gaṇha corāti adāsi. Evaṃ brāhmaṇo nānāvidhehi upāyehi aññehi bahū aticāriniyo rañño dassetvā idha tāva ettakaṃ hotu aññattha gamissāma devāti āha. Rājā sakalajambūdīpe caritepi sabbā itthiyo evarūpā bhavissanti kinno etāhi nivattāma itoti bārāṇasimeva paccāgantvā mahārāja itthiyo nāma evaṃpāpadhammā pakati esā etāsaṃ etissā khamatha deva kinnarīdeviyāti purohitena yācito khamitvā rājanivesanato naṃ nikkaḍḍhāpesi ṭhānato pana taṃ apanetvā aññaṃ aggamahesiṃ akāsi. Tañca pīṭhasappiṃ tato nikkaḍḍhāpetvā jambūsākhaṃ chedāpeti.