Atha ne rājā āha ahametaṃ attano gehaṃ ānetuṃ evaṃ kāresiṃ etissā samphassaṃ ajānantā hi maṃ paribhaveyyunti cintesiṃ tasmā mayā sabbe tumhe jānāpitā vadatha dāni kassesā gehe bhavituṃ yuttāti. Tumhākaṃ devāti. Atha naṃ rājā abhisiñcitvā aggamahesiṃ akāsi mātāpitūnaṃpissā issariyaṃ dāpesi. Tato paṭṭhāya ca pana tāya sammatto neva vinicchayaṃ paṭṭhapesi na aññaṃ itthiṃ olokesi. Tā tassā antaraṃ pariyesiṃsu. Sā ekadivasaṃ dvinnaṃ rājūnaṃ aggamahesibhāvāya supine nimittaṃ disvā rañño ārocesi. Rājā supinapāṭhake pakkosāpetvā evarūpe supine diṭṭhe kiṃ bhavissatīti pucchi. Te itarāsaṃ itthīnaṃ santikā lañcaṃ gahetvā mahārāja deviyā sabbasetassa hatthino khandhe nisinnabhāvo tumhākaṃ maraṇassa pubbanimittaṃ hatthikkhandhe ṭhitāya candaparāmasanaṃ tumhākaṃ paccāmittarājānayanassa pubbanimittanti vatvā idāni kiṃ kātabbanti vutte deva imaṃ māretuṃ na sakkā nāvāya pana naṃ ṭhapetvā nadiyaṃ visajjetuṃ vaṭṭatīti vadiṃsu. Rājā āhāravatthālaṅkārehi saddhiṃ rattibhāge taṃ nāvāyaṃ Ṭhapetvā nadiyaṃ visajjāpesi. Sā nadiyā vuyhamānā heṭṭhā nadiyā nāvāya udakakīḷaṃ kīḷantassa bāvariyarañño abhimukhaṭṭhānaṃ pāpuṇi. Tassa senāpati nāvaṃ disvā ayaṃ nāvā mayhanti āha. Rājā nāvāya bhaṇḍaṃ mayhanti vatvā āgatāya nāvāya taṃ disvā kā nāma tvaṃ pisācīsadisāti pucchi. Sā hasitaṃ katvā bakassa rañño aggamahesibhāvañca sabbaṃ pavuttiñca tassa kathesi. Sā pana pañcapāpāti sakalajambūdīpe pākaṭā. Atha naṃ rājā hatthe gahetvā ukkhipi. Saha gahaṇeneva phassarāgaratto aññāsu itthīsu saññaṃ akatvā taṃ aggamahesiṭṭhāne ṭhapesi. Sā tassa pāṇasamā ahosi. Bako rājā taṃ pavuttiṃ sutvā nāhantassa taṃ aggamahesiṃ kātuṃ dassāmīti senaṃ saṅkaḍḍhitvā senāya gacchamāno nadītitthe nivāsaṃ patvā paṇṇaṃ pesesi bhariyaṃ vā me detu yuddhaṃ vāti. So yuddhaṃ dassāmi na bhariyanti vatvā yuddhasajjo ahosi. Ubhinnaṃ amaccā mātugāmaṃ nissāya maraṇakiccaṃ ayuttaṃ purimasāmikattā esā bakassa pāpuṇāti nāvāya laddhattā bāvariyassāti tasmā ekekassa rañño gehe satta satta divasāni hotūti mantetvā dvepi rājāno saññāpesuṃ. Te ubhopi attamanā hutvā titthapaṭititthe nagarāni māpetvā vasiṃsu. Sā dvinnaṃpi tesaṃ aggamahesitaṃ akāsi. Dvepi tassā sammattā ahesuṃ. Sā pana ekekassa ghare sattāhaṃ vasitvā nāvāya itarassetarassa gharaṃ gacchantī nāvaṃ pājetvā nentena ekena mahallakakhujjakevaṭṭena Saddhiṃ nadīmajjhe pāpamakāsi.