na parassa bhariyā na dhanassa hetu
etitthiyo pañca na sevitabbāti.
Tattha khuddānanti luddhānaṃ. Kaṇaverajātake viya bandhacorepi sārajjanaṃ sandhāyetaṃ vuttaṃ. Lahucittānanti taṃ muhuttameva parivattacittānaṃ. Culladhanuggahajātakenetaṃ dīpetabbaṃ. Akataññutā pana etāsaṃ ekanipāte takkāriyajātakena dīpetabbā. Nādevasattoti na adevasatto devena asatto anāsatto ayakkhagahitako abhūtāvaṭṭito puriso thīnaṃ sīlavatavādaṃ saddhātuṃ arahati bhūtāvaṭṭo pana saddaheyya. Katanti attano kataṃ upakāraṃ. Kiccanti attanā Kattabbakiccaṃ. Na mātaranti sabbepi ñātake chaḍḍetvā yasmiṃ paṭibaddhacittā honti taññeva anubandhanato ete mātādayopi na jānanti nāma mahāpanthakamātā viya. Anariyāti nillajjā. Sassevāti sakassa. Āvāsūti āpadāsu. Kiccesūti tesu tesu karaṇīyesu. Kannappakannanti otiṇṇotiṇṇaṃ. Yathā hi visame padese rukkhachāyā ninnaṃpi orohati thalaṃpi orohati tatheva tāsaṃpi cittaṃ na kañci uttamādhamaṃ vajjeti. Calācalanti ekasmiññeva appatiṭṭhitaṃ. Nemīti sakaṭassa gacchato cakkanemi viya parivattamānā. Ādeyyarūpanti gahetabbajātikaṃ. Vittanti dhanaṃ. Nayantīti attano vasaṃ nenti. Jalajenāti jalajātasevālena. Kambojaraṭṭhavāsino kira yadā aṭavito asse gaṇhitukāmā honti tadā ekasmiṃ ṭhāne vatiṃ parikkhipitvā dvāraṃ yojetvā assānaṃ udakapānapiṭṭhe sevālaṃ madhunā makkhetvā sevālasaṃbandhāni tīre tiṇāni ādiṃ katvā yāva parikkhepadvārā makkhenti assā pānīyaṃ pivitvā rasagiddhena madhumakkhitāni tiṇāni khādituṃ carantā anukkamena taṃ ṭhānaṃ pavisanti. Iti yathā te jalajena palobhetvā assaṃ vasaṃ nenti tathā etāpi dhanaṃ disvā etassa gahaṇatthāya saṇhāhi vācāhi purisaṃ vasaṃ nentīti attho. Kullanti pārataraṇatthāya yaṃ kiñci gahitaṃ bandhaṃ. Silesūpamāti purisānaṃ cittabandhanena silesasadisā. Tikkhamāyāti tikhiṇamāyā sīghamāyā. Nadīrivāti yathā pabbateyyā nadī sīghasotā evaṃ sīghamāyāti attho. Āpaṇoti yathā ca pasāritāpaṇo yesaṃ Dhanānaṃ mūlaṃ atthi tesaṃyeva upakāro tatheva tāpi. Yo tāti yo puriso tā itthiyo. Bandhayeti so jālena vātaṃpi bandheyya. Velā tāsaṃ na vijjatīti yathā etesaṃ nadīādīnaṃ asukavelāyameva ettha gantabbanti velā natthi rattiṃpi divāpi icchiticchitakkhaṇe upagantabbā neva asukena vātipi mariyādā natthi atthikena upagantabbā neva tathā etāsaṃpīti attho. Ghatāsanasamāti yathā aggi indanena na tappati evaṃ etāpi kilesaratiyā na tappanti. Kaṇhasappasirūpamāti kodhanatāya ghoravisatāya upanāhatāya dujjivhatāya mittadubbhitāyāti imehi pañcahi kāraṇehi kaṇhasappasirasadisā. Tattha bahalarāgatāya ghoravisatā pisuṇatāya dujjivhatā aticāritāya mittadubbhitā veditabbā. Bahi tiṇassāti yathā gāvo khāditabbaṭṭhānaṃ chaḍḍetvā bahi manāpamanāpassa tiṇassa varaṃ varaṃ omasanti khādanti evametāpi niddhanaṃ purisaṃ chaḍḍetvā aññaṃ sadhanameva bhajantīti attho. Muddhābhisittanti rājānaṃ. Pamudā ca sabbāti sabbā itthiyo. Eteti ete pañca jane. Niccayatoti niccasaṃyato upaṭṭhitasati appamattova hutvāti attho. Dubbidūti dujjāno. Saccabhāvoti ajjhāsayo. Cirapariciṇṇopi hi aggi dahati. Ciravissāsikopi kuñjaro ghāṭeti. Ciracitopi ghoraviso sappo ḍaṃsati. Ciravissāsikopi rājā anatthakaro hoti. Evaṃ cirapariciṇṇāpi itthiyo vippakāraṃ dassenti. Nāccantavaṇṇāti na ativaṇṇā. Na bahūna kantāti aḍḍhakāsikagaṇikā viya na bahūnaṃ Piyā manāpā. Na dakkhiṇāti naccagītakusalā. Tathārūpāhi bahūhi patthitā bahumittā honti tasmā na sevitabbā. Na dhanassa hetūti yā dhanahetuyeva bhajati sā apariggahāpi na sevitabbā. Sā hi dhanaṃ alabhamānā kujjhati.